ღორის ხორცისა და გოგრის წვნიანი

ღორის ხორცისა და გოგრის წვნიანი

ეს ისეთი კერძია, ზამთრის ცივ დღეებს რომ გითბობს, განაყრებს, გაბედნიერებს. გავიწყდება ის წესი, მაგიდიდან ცოტა მშიერი რომ უნდა ადგე. მიირთმევ, სავარძელში მოკალათდები ან  ფეისბუქს “ჩასქროლავ” ან  ჟურნალს გადაფურცლავ, ერთი სიტყვით მოდუნდები…

რადგან კალიფორნიაში ზამთარი, როგორსაც აქამდე ვიცნობდი, არ არსებობს, ასეთი კერძის მოსამზადებლად წვიმიან ამინდებს ვირჩევ ხოლმე. სხვათა შორის, არც წვიმიანი დღეებით ვართ განებივრებული :)  აი ახლაც, ამ პოსტს რომ ვწერ, ჩემს ქუჩაზე გარგრისა და ტყემლის ხეები  ყვავის და  მზე კაშკაშებს. მაგრამ თბილისში ხომ ჯერ ისევ ზამთარია, ამიტომ, ვფიქრობ, ეს რეცეპტი გამოგადგებათ.

ადრეც ვწერდი ამერიკელების სიყვარულზე გოგრის მიმართ. სულ ნაირ-ნაირები იყიდება ბაზარში და მარკეტებში, მეც ხშირად ვყიდულობ. ამჯერად რეცეპტში საკმაოდ გემრიელ Butternut squash-ს ვიყენებ. ასეთები საქართველოშიც მინახავს, მაგრამ სხვა ნებისმიერი ჯიშის გოგრა გამოდგება.

gogris cvniani

  • 500 გ ღორის უცხიმო ხორცი
  • 400 გ გოგრა
  • 3 კარტოფილი
  • 1-2 ს.კ პამიდვრის სოუსი
  • 1 თავი ხახვი
  • დაფნა
  • მარილი, პილპილი
  • ოხრახუში, ქონდარი
  • წიწაკა

 

პატარა კუბებად დაჭრილი ხორცი მოვბრაწოთ ღრმა ქვაბში, ცხელ ზეთში. დავამატოთ წვრილად დაჭრილი ხახვი და კიდევ ვშუშოთ რამდენიმე წუთი. შემდეგ დავამატოთ დაფნა, დაჭრილი გოგრა და კარტოფილი,  დავასხათ წყალი (დაახლოებით 1.5 – 2 ლ, გააჩნია რა სისქის სუპი გვსურს) და მოვხარშოთ. აქვე ორიოდე სიტყვა გოგრაზე: როგორც მიხვდით, გათლილი უნდა იყოს. მაგრამ უმი  გოგრის გათლა არც ისე ადვილია. ამიტომ, თუ არ გსურთ, რომ ჩემსავით შესწიროთ საკუთარი თითის “ჯანმრთელობა” სუპის მომზადებას, გოგრა შედარებით მომცრო ნაჭრებად დაჭერით და შემდეგ ჩამოაჭერით კანი. წყალს ბევრს ნუ დაამატებთ, ცოტა სქელი უფრო გემრიელია, ვიდრე წყალ-წყალა.

მზა სუპს დავამატოთ პომიდვრის პიურე დაკიდევ წამოვადუღოთ. ჩემი ფავორიტია ბარილას მზა სოუსი, რომელიც ნივრისა და ბაზილიკის არომატითაა და ძალიან გემრიელია. ტომტ-პასტას სჯობს.

ბოლოს შევაზავოთ პილპილით, წიწაკით, მარილით და დაჭრილი მწვანილით. მე ქონდრის აქაური ნათესავი thyme  და ოხრახუში გამოვიყენე. თქვენ თქვენი გემოვნებით შეაზავეთ. სუპს უხდება ცოტა სიცხარე, რაც გოგრის გემოსთან კონტრასტში მოდის და აბალანსებს კიდეც.

gogris soup

Use Facebook to Comment on this Post

გოგრის სუპი ქათმის ხორცით – ჯანსაღი, მარტივი, გემრიელი

გოგრის სუპი ქათმის ხორცით – ჯანსაღი, მარტივი, გემრიელი

მართლაც, სხვა რა მოეთხოვება სუპს? სასარგებლო უნდა იყოს, მარტივი და რაც მთავარია – გემრიელი! უნდა გათბობდეს და განაყრებდეს. ეს სუპი სრულად პასუხობს წაყენებულ მოთხოვნებს და შესაბამისად, ყველაზე გემრიელი ბლოგის “ფურცლებზე” გამოჩენასაც :)

gogris supi

მაშ ასე, დავიწყოთ:

  • 400 გ გოგრა (გარჩეული)
  • 200 გ ქათმის ფილე
  • 1-2 კარტოფილი
  • ½ ჭიქა წითელი ოსპი
  • 1.5 ლ წყალი
  • 1 თავი ხახვი
  • დაფნის ფოთოლი
  • მარილი, პილპილი
  • ოხრახუში, ქონდარი
  • დაფშვნილი ყველი (აუცილებელი არ არის, მაგრამ უხდება)

ქათმის ფილე დავჭრათ მომცრო ნაჭრებად, ხახვი წვრილად. ქვაბში გავაცხელოთ. 2-3 ს.კ ზეთი და დავბრაწოთ ფილე, შემდეგ დავამატოთ ხახვი, ცეცხლს დავუწიოთ და მოვშუშოთ.

გოგრა და კარტოფილი  დავჭრათ მომცრო კუბებად და ჩავამატოთ ქვაბში. დავასხათ წყალი და წამოვადუღოთ.  ჩავყაროთ გარეცხილი ოსპი და დაფნის ფოთოლი. დავაფაროთ და ვხარშოთ  დაახლოებით 20 წუთი, ოსპისა და ბოსტნეულის სრულ დარბილებამდე. ბოლოს დავამატოთ მარილი, პილპილი, დაჭრილი ოხრახუში და ცოტა ქონდარი. თეფშზე გადმოღების შემდეგ სუპს მოაყარეთ თითო კოვზი დაფშვნილი, ნაკლებ მარილიანი ყველი. აქ ვიყენებ მექსიკურ ყველს queso fresco – ე.წ. ნედლი ყველია, არა გამომშრალი.

ბონ აპეწი და მომავალ რეცეპტამდე :)

 

Use Facebook to Comment on this Post

ცივი საზაფხულო სუპი

ცივი საზაფხულო სუპი

ეს სუპი მარტივი, სწრაფი, გემრიელი და მსუბუქი საზაფხულო კერძების კატეგორიიდანაა. არც ბევრი ინგრედიენტები დაგჭირდებათ და არც დიდი ძალისხმევა.

დაგჭირდებათ:

  • კარტოფილი – 3 დიდი ან 4 საშუალო
  • პომიდორი – 4 ც
  • კიტრი – 4 ც
  • წითელი პაპრიკა (ბულგარული წიწაკა) – 2 ც
  • მწვანილი (ქინძი, მწვანე ხახვი, ოხრახუში)
  • მარილი, ხმელი წითელი წიწაკა, წყალი
  • ბლენდერი

პირველ რიგში კარტოფილი გათალეთ და პატარა ნაჭრებად დაჭერით, რომ მალე მოიხარშოს.

ამასობაში გარეცხეთ ბოსტნეული, მწვანილის ჩათვლით და დაჭერით. მოხარშული და გაგრილებული კარტოფილი შეურიეთ ბოსტნეულს და კარგად დააბლენდერეთ, ვიდრე ერთგვაროვან მასას არ მიიღებთ. ეცადეთ, მწვანილის ღერები არ შეაყოლოთ, არც ისე ადვილად იქნება ბლენდერში სხვა ბოსტნეულთან ერთად.

მიღებული მასა საკმაოდ სქელია, ამიტომ დაამატეთ წყალი და კარგად აურიეთ ან ისევ დააბლენდერეთ, ვიდრე სუპი თქვენთვის სასურველი კონსისტენციის არ გახდება. დაამატეთ მარილი და წითელი წიწაკა გემოვნებით, გადაიტანეთ ემალირებულ ქვაბში და შედგით მაცივარში.

მიირთვით ძალიან ცივი. განსაკუთრებით გემრიელია ცხელ კრუტონებთან ერთად (კრუტონების დამზადების წესი იხილეთ ამ პოსტში)

სურვილისამებრ შეგიძლიათ დაუმატოთ ნივრიანი არაჟანი ან ნაღებიც.

sazafxulo-supi

გემრიელად მიირთვით :))

 

Use Facebook to Comment on this Post

წვნიანი მიდიებით

წვნიანი მიდიებით

დღეს ისე გრილა, ცხელი და ცხარე წვნიანის ჭამა სასიამოვნოც კია :)  ეს მიდიების არომატული სუპია, ღვინით და ოსპით.  თუ სახლში ყველა ინგრედიენტი გაქვთ, სცადეთ, გემრიელი, სასარგებლო და სურნელოვანია :)

midia soup

 

250-300 გ გარჩეული მიდიები

1 სტაფილო

½ ჭ წითელი ოსპი

1 ხახვი

1 კბილი ნიორი

600 მლ წყალი

½ ჭ წითელი ღვინო (თეთრიც შეიძლება)

½ ჭ ტომატის საწებელი ან პამიდვრის პიურე

ბაზილიკი

მარილი, პილპილი, წითელი წიწაკა

ოხრახუში

 

ხახვი, სტაფილო და ნიორი ზეითუნის ზეთში მსუბუქად  მოვშუშოთ, დავამატოთ პამიდორი და წამოვადუღოთ. შემდეგ დავამატოთ ღვინო. ხელახალი წამოდუღების შემდეგ დავამატოთ ოსპი და წყალი.

დაახლოებით 15-20 წუთში, როცა ოსპი დარბილდება, დავამატოთ მიდიები და ვხარშოთ კიდევ 10 წუთი.

ბოლო ეტაპზე დავამატოთ ბაზილიკი, პილპილი, წიწაკა და მარილი გემოვნებით,  ასევე დაჭრილი ოხრახუში.  წვნიანს ძალიან უხდება მსუბუქი სიცხარე

გემრიელად მიირთვით :)

Use Facebook to Comment on this Post

ქათმის ნიგვზიანი ხარჩო

ქათმის ნიგვზიანი ხარჩო

ეს კერძი ალბათ ყველა ოჯახში მზადდება. ყველას თავისი საყვარელი რეცეპტიც ექნება, მაგრამ მაინც გადავწყვიტე დამეწერა ჩემებურიც. ასეთი ხარჩო ძალიან მიყვარს,თუმცა ვაღიარებ, ხშირად არ ვამზადებ. ბრინჯს არ ვამატებ, არ მომწონს.

xarco

1.5 კგ ქათამი

120 გ ნიგოზი

1 დიდი ხახვი

2-3 კბ. ნიორი

1 ჩ.კ. წიწაკა (ან გემოვნებით)

1 ჩ.კ უცხო სუნელი

½ ჩ.კ ყვითელი ყვავილი

1 ს.კ ფქვილი

1 ს.კ ტომატ-პასტა (ან 50 მლ პამიდვრის საწებელი, ან 1 დიდი ცოცხალი პამიდორი)

700 მლ წყალი

მარილი

დაფნის ფოთოლი

ნედლი ქინძი

 

დაჭრილი ქათამი ჩავალაგოთ სქელძირიან ქვაბში და დაბალ ცეცხლზე ჩავთუთქოთ.  ან მეორენაირად:  ჯერ დავბრაწოთ მაღალ ცეცხლზე და შემდეგ დაბალზე გავაგრძელოთ შუშვა.  ამ ეტაპზევე შეგვიძლია დავაყაროთ დაჭრილი ხახვი, ან თუ ხახვის ნაჭრები არ მოგვწონს კერძში ნიგოზთან ერთად დავაქუცმაცოთ კომბაინში (მე სწორედ ასე ვაკეთებ).

სანამ ქათამი იშუშება, ნიორი, ნიგოზი და სურვილის შემთხვევაში ხახვიც დავფქვათ კომბაინში ან  ხორცსაკეპში გავატაროთ. შევურიოთ წიწაკა, უცხო სუნელი, ყვითელი ყვავილი, ტომატ პასტა, ფქვილი და გავხსნათ წყალში.

დავასხათ ეს ყველაფერი სანახევროდ უკვე მზა ქათამს, ჩავამატოთ დაფნის ფოთოლი და ვხარშოთ ხორცის საბოლოო მომზადებამდე, დაახლოებით 10 წუთი.

მზა კერძს ბოლოს დავამატოთ მარილი და დაჭრილი ქინძი.

ჭეშმარიტად გემრიელი და კალორიული კერძია :)

 

Use Facebook to Comment on this Post

ტომატის სუპი

ტომატის სუპი

ზაფხულის ნეტარ ხვატს ერთი გემრიელი ცხელი სუპი თუ არ შევაშველეთ, რაა მამული?!  :)

ცხელი, ქაფქაფა სუპისთვის დაგჭირდებათ:

სტაფილო – 2 ცალი

ნიახური – 2/3 ღერი

ხახვი – 2 საშუალო ზომის თავი

ნიორი – 2 კბილი

ზეთისხილის ზეთი – 3 სუფრის კოვზი

ქათმის ან ბოსტნეულის მშრალი ბულიონი – 2 კუბიკი

ტომატის პიურე –  200 გრამი

პომიდორი – 3 – 4 ცალი

ცოცხალი ბაზილიკი ან რეჰანი – 1 პატარა კონა

მარილი და ახლად დაფქული შავი პილპილი გემოვნებით

კერძი მარტივია, მზადდება დაახლოებით 25-30 წუთში, იმის მიხედვით თუ როგორ სხარტად იტრიალებთ სამზარეულოში.

პირველ რიგში დაჭერით ხახვი, სტაფილო, ნიახური, ნიორი და ეს ყველაფერი ნელ ცეცხლზე შუშეთ ზეთისხილის ზეთში, მაქსიმუმ 10 წუთის განმავლობაში. არ დაგავიწყდეთ პერიოდულად ურიოთ ხის კოვზით.

ნიახურმა და ნიორმა საოცარი სურნელი დაატრიალა სამზარეულოში <3

ცალკე ადუღებულ, ქაფქაფა წყალში გახსენით მშრალი ბულიონის კუბიკები, ასევე გაფცქვენით და დაჭერით პომიდორი, დაუმატეთ ტომატ პასტა და ჯერ ბულიონი, ხოლო შემდგომ პომიდორის მიქსი ჩაუშვით ქვაბში ( სადაც წინასწარ დაჭრილი ინგრედიენტები ნელ ცეცხლზე იშუშება).

სუპი მიიყვანეთ ადუღებამდე და იდუღოს 10-15 წუთის განმავლობაში ნელ ცეცხლზე. ამის შემდეგ გადმოდგით, ჩააჭერით ქორფა რეჰანი (თუ ბაზილიკი გაქვთ მე მშურს თქვენი) და ხელის ბლენდერით ერთიან მასად აქციეთ ცხელ-ცხელი სუპი.

შეკმაზეთ გემოვნებით მარილით და ახლად დაფქული შავი პილპილით.

 

ტომატის სუპი
ტომატის სუპი

პ.ს. ვხუმრობ, თორემ მთლად პირს ნუ დაითუთქავთ, გრილადაც შეგიძლიათ მიირთვათ. :)

რეცეპტისთვის მადლობა უგემრიელეს ჯემი ოლივერს. 

Use Facebook to Comment on this Post

თეთრი კრემ-სუპი ოხრახუშის პესტოთი

თეთრი კრემ-სუპი ოხრახუშის პესტოთი

მე ეს კრემ-სუპი ძალიან მიყვარს. ჯერ ერთი, ძალიან მარტივია, თან გემრიელი. თევზთან ერთად განსაკუთრებით, თუმცა მის გარეშეც შეიძლება. უფრო ხშირად ცივ დღეებში ვამზადებ, თუმცა მსუბუქია და ნებისმიერ დროს შეიძლება მირთმევა. იმედი მაქვს მოგეწონებათ და თქვენს მენიუშიც შეიტანთ :)

sipi tetri

 

400 გ ყვავილოვანი კომბოსტო

400 გ კარტოფილი

1 ხახვი

1-2 კბილი ნიორი

4 ს.კ ოხრახუშის პესტო (რეცეპტისთვის დააწკაპუნეთ ამ ბმულზე )

მარილი და პილპილი

დამარილებული ორაგული სურვილით

 

წვრილად დაჭრილი ხახვი და ნიორი მოვშუშოთ ზეითუნის ზეთში. ~

დავამატოთ დაჭრილი კარტოფილი და დაახლოებით 600-800 მლ წყალი.

კარტოფილი რომ თითქმის მოიხარშება, ჩავამატოთ ყვავილოვანი კომბოსტო და ვხარშოთ დარბილებამდე.

სუპი ბლენდერით ვაქციოთ ერთიან მასად და დავამატოთ მარილი და პილპილი გემოვნებით. (თუ სუპი სქელი მოგეჩვენათ, გაათხელეთ წყლით)

მზა წვნიანს თეფშზე გადმოღების შემდეგ ვამატებთ თითო კოვზ ოხრახუშის პესტოს და ორაგულის ნაჭრებს.

 

Use Facebook to Comment on this Post