თუ გადაწყვეტთ, რომ მოამზადოთ, მოიმარაგეთ:

2 ულუფისთვის

1 პატარა კონა სალათის ფურცლები, ნებისმიერი სახეობა, რომელიც გაქვთ

1 პამიდორი

1 მომცრო კიტრი

1 ვაშლი

ცოტაოდენი ოხრახუში და რეჰანი

ყველი , თხელ ფირფიტებად ათლილი ( მე მქონდა ედამერი)

სოუსი: 1 ს.კ ლიმონის წვენი, 2 ს.კ, ზეითუნის ზეთი, 1 თოხლოდ მოხარშული კვერცხის გული, 1/2 ჩ.კ . მდოგვი, მსხვილად დაფქული წითელი წიწაკა, მწიკვი მარილი და ცოტა შაქარი

დანარჩენი უკვე მარტივია: თეფშზე მოათავსეთ სალათი, მწვანილი,  თხლად დაჭრილი ბოსტნეული, ყველი  და მოასხით სოუსი .

გემრიელად მიირთვით  და ნუ შეგეშინდებათ კალორიების. ჭამა ხომ სიამოვნებაა

1 ქათმის ფილე (მთლიანი მკერდის ნახევარი)

1 გრეიფრუტი

1 კონა სალათის ფოთლები

ობიანი ყველის 1-2 ნაჭერი, კუბებად დაჭრილი

სოუსი: 2 ს.კ გრეიფრუტის წვენი, 2-3 ს.კ ზეითუნის ზეთი, 1/2 ჩ.კ დიჟონის მდოგვი, წითელი მსხვილად დაფქული წიწაკა, შავი პილპილი, სულ ცოტა შაქარი

ძალიან მსუბუქად დაბეგვილი ქათმის ფილე შეწვით ორივე მხრიდან. მოაყარეთ მარილი და პილპილი.

გრეიფრუტი გაფცქვენით და ამოაჭერით ლებნები თეთრი კანის გარეშე. ნარჩენებიდან კი გამოწურეთ 2 სუფრის კოვზი წვენი სოუსისთვის.

თეფშზე ან თასში მოათავსეთ ყველა ინგრედიენტი.

ზეითუნის ზეთი, გრეიფრუტის წვენი,მდოგვი,წიწაკა, პილპილი და მწიკვი შაქარი აურიეთ კარგად და მოასხით სალათს.

მარილს აღარ ვამატებ, რადგან ყველს საკმაო სიმლაშე აქვს, ჩემი აზრით,  ქათამსაც ვაყრით და მდოგვიც მარილიანია.  თქვენ თქვენი გემოვნების მიხედვით შეაზავეთ.

ძირი გავუკეთე დაფხვნილი ორცხობილისა და კარაქის ნარევით, ისე როგორც ჩიზქეიქებს უკეთებენ. კრემი არაჟნით ვცადე, მაგრამ მეტი  სარგებლიანობის თვალსაზრისით, ხაჭოც გავურიე.  საბაზო რეცეპტში ვწერდი, რომ არაჟნიანი კრემი, მართალია განსხვავდება ნაღებიანისგან, მაგრამ არანაკლებად გემრიელია. ხაჭოთიც კარგია, მით უფრო თუ გიყვართ ეს სასარგებლო პროდუქტი, თუმცა აქ კიდევ სხვა გემო მივიღე.

ძირისთვის საჭიროა ტკბილი ორცხობილა (”პეჩენია”) და დარბილებული კარაქი 2:1 პროპორციით. ანუ 200 გრამი დაფხვნილი ორცხობილა, 100 გ კარაქი. ეს რაოდენობა საკმარისია 26 სმ დიამეტრის მთლიანი ფორმისთვის. შესაძლებელია ორცხობილის რაოდენობა მოაკლოთ და დაამატოთ დაფქული ნიგოზი, ნუში, თხილი. მე გავაკეთე ინდივიდუალურ ფორმებში. სინამდვილეში ეს ფორმები ცომის საჭრელებია, ამიტომაა სხვადასხვა ზომის, მაგრამ წარმატებით ვიყენებ ასეთ შემთხვევებშიც თუ თქვენც ასე ულუფებად გადაწყვეტთ მომზადებას,  რაიმე შესაბამის ფორმაში ან დაფაზე დააფენთ პერგამენტის ქაღალდს, დაალაგებთ ფორმებს, გაანაწილებთ მათში ორცხობილიან მასას და კარგად დატკეპნით კოვზის საშუალებით. გააცივებთ მაცივარში და შემდეგ ჩადებთ კრემს.

კრემის მომზადებაზე ინფორმაცია პირველ აბზაცში მითითებულ ბმულზე იხილეთ, აქ აღარ გავიმეორებ ერთადერთი ცვლილება ისი იყო, რომ არაჟანს მოვაკელი რაოდენობა და რამდენიმე კოვზი საცერში გატარებული ხაჭო დავამატე.

ცოტაოდენ მარწყვს დავაყარე შაქარი, წვენი რომ გაუშვა, ერთიანად დავაბლენდერე. მიღებული პიურეთი კი გავაფორმე ინდივიდუალური ულუფები.

სულ ეს იყო. თქვენც სცადეთ

ბევრი რომ არ გავაგრძელო, შემონახულ რეცეპტს რაღაც მოვაკელი, რაღაც მივამატე და რაც გამოვიდა , თქვენს წინაშე ვამზეურებ:)

1 კონა რეჰანი (ჩვენებური, წითელი) 7-8 ტოტი

1 ჩაის ჭ მარწყვი

100 გ შაქარი

1 ლიმონი

1.5 ლ წყალი

რეჰანი კარგად გარეცხეთ, რომ მიწის ნამცეცები არ შეჰყვეს, ძირები  (და არა მთელი ღერო) მოაჭერით. მსხვილად დაჭრით და შაქართან   ასრისეთ მსუბუქად. მე ეს პროცედურა ქვაბში ჩავატარე. დააყარეთ დაჭრილი მარწყვი (თუ მარწყვი მსხვილია) , დააწურეთ 1 ლიმონის წვენი და დაასხით მდუღარე წყალი. კარგად მოურიეთ რომ შაქარი გაიხსნას. თავზე დააფარეთ და გააგრილეთ, შემდეგ კი მაცივარში ჩააციეთ.

სუფრაზე მიიტანეთ უკვე გადაწურული, გნებავთ ყინულით, გნებავთ მის გარეშე. სილამაზისთვის შეგიძლიათ მარწყვის ან ლიმონის  ნაჭერი და  რეჰანის ფოთოლი ჩაამატოთ ჭურჭელში.

800 გ-1 კგ საქონლის მჭლე , რბილი ხორცი (რეკომენდირებულია ბეჭის ნაწილი)

1 ბოთლი ბურგუნდიული წითელი ღვინო, (კარგი ქართული წითელიც გამოდგება, რა თქმა უნდა )

2-3 დიდი სტაფილო

2 თავი თეთრი ხახვი

150-200 მლ ხორცის კონცენტრირებული ბულიონი ან წყალი

2 კბილი ნიორი

1 სავსე სადილის კოვზი ფქვილი

1 ბუკე გარნი (bouquet garni-ქვემოთ მოგიყვებით მის შესახებ)

100 გ. ბეკონი, სასურველია შებოლილი

მარილი, პილპილი

ამას გარდა, ზოგ რეცეპტში გვხვდება 250 გ ქამა სოკო და   წვრილი ხახვი  grelot , რომელიც თბილისში არასდროს შემხვედრია და არც მე გამომიყენებია. მით უფრო რომ მოხარშული ხახვის ჭამა არ მხიბლავს. მე სოკოს გარეშე მოვამზადე, თქვენ შეგიძლიათ სოკოც დაამატოთ.

ახლა ორიოდ სიტყვას ბუკე გარნი bouquet garni-ზეც გეტყვით.  ეს არის სხვადასხვა არომატული მცენარის ნაკრები, რომელსაც ძაფით შეკრულს ამატებენ წვნიანებში და ბულიონებში. დაფნის ფოთოლი და ოხრახუშის ღეროები მისი უცვლელი ინგრედიენტებია, თუმცა  კერძის მიხედვით, შეიძლება შეიცვალოს მისი შემადგენლობა, დაემატოს ბაზილიკი, ტარხუნა, ნიახურის ღერო და სხვა.  კონკრეტულად ამ კერძის ბუკე გარნიში უნდა შედიოდეს ოხრახუშის ღეროები, სისქე-სიდიდის მიხედვით 5-7 ცალი, 1მოზრდილი დაფნის ფოთოლი და ქონდრის ტოტი. ქონდარი ტოტის სახით არ მქონდა, მხოლოდ ხმელი ფოთლები, ამიტომ ის დავამატე. კერძის მომზადება მოიცავს 2 ეტაპს. პირველ დღეს ხორცი დაჭერით საშუალო ნაჭრებად და დაასხით წითელი ღვინო. ზოგი ვერსიით, ღვინოში ხორცთან ერთად დაჭრილი სტაფილოც იდება. მოკლედ, როგორც გინდათ  შედგით მაცივარში მთელი ღამით. მეორე დღეს, ხორცი ამოიღეთ ღვინიდან და დაწურეთ, შეაშრეთ ქაღალდის ხელსახოცზე.

აიღეთ სქელძირიანი, მაღალი ქვაბი. ბეკონი დაჭერით 1 სმ ზომის ნაჭრებად და შეწვით ამ ქვაბში, ზეთში ან კარაქში. შემწვარი ბეკონი ამოიღეთ და დარჩენილ ცხიმში შეწვით სითხისგან შემშრალი ხორცი. სასურველია შეწვათ ნაწილ-ნაწილ, თორემ ბევრი ხორცი ერთად დაბრაწვის მაგივრად ჩაიშუშება. როცა ხორცის ბოლო ნაწილსაც დაბრაწავთ, ჩაამატეთ უკვე შემწვარი ხორციც, მოაყარეთ ფქვილი და ამოურიეთ. დაამატეთ დაჭრილი სტაფილო, ნიორი და ხახვი (ნახევარ რგოლები). დაასხით თავისივე ღვინის მარინადი,ჩააგდეთ ბუკე გარნი.  თუ სითხე არ ფარავს ხორცს, ამატებთ ბულიონს ან წყალს. თუ სოკოთი ამზადებთ, ამ ეტაპზევე დაამატეთ დაჭრილი და შებრაწული (ან უმი) სოკოც. წამოადუღეთ და შემდეგ დაუწიეთ ცეცხლს მინიმალურ ზღვრამდე. კერძი უნდა მომზადდეს ძალიან დაბალ ცეცხლზე,თითქმის მბჟუტავზე, 2-3 საათის განმავლობაში, ეს დამოკიდებულია ხორცის სირბილეზე.

ამ დროის გასვლის შემდეგ, ამოიღეთ ბუკე გარნი კერძიდან. წვენი უნდა იყოს შესქელებული, ხორცი კი უნაზესი. ჩაამატეთ შემწვარი ბეკონი და ცოტა კიდევ ადუღეთ. ბოლოს დაამატეთ მარილი და ახალდაფქული შავი პილპილი გემოვნებით.

ამ კერძს მიირთმევენ ნივრიანი გახუხული პურებით,  გარნირით ან მის გარეშე. გარნირი შეიძლება იყოს მაკარონი, კარტოფილის პიურე ან უბრალოდ მოხარშული კარტოფილი. ასევე ძალიან გემრიელია მეორე დღესაც.

ძალიან გემრიელი კერძია, აუცილებლად უნდა სინჯოთ!  და ნუ დაიზარებთ გაგვიზიაროთ თქვენი შთაბეჭდილებები კომენტარებში და ჩვენს ფეისბუქის გვერდზე

პ.ს. კერძის ფერი შეიძლება განსხვავდებოდეს და დამოკიდებულია ღვინის ფერზე. რაც უფრო მუქია ღვინო, კერძიც შესაბამისად მუქ ფერს იღებს. ჩემი წითელი ღვინო იყო, მუქი შინდისფერი და კერძი უფრო ღია ფერისაა ამიტომ

სალათის ძირითადი ინგრედიენტები:

• ჭარხალი, სტაფილო, კარტოფილი – თითო ცალი (მოზრდილი ზომის)
• ბოლოკი – 1 ან 2 ცალი
• კიტრის მწნილი – გემოვნებით
• კვერცხი – 1 ან 2 ცალი (მხოლოდ არასამარხვო ვარიანტში)
• მაიონეზი – სამარხვო ან არასამარხვო, დაახლ. 100 გრ.
• ხმელი ქინძი, უცხო სუნელი, მარილი, შავი პილპილი, მწვანილი – გემოვნებით

პირველ რიგში, ბოსტნეული და კვერცხი იხარშება და იხეხება მსხვილ სახეხზე. ასევე ვხეხავთ ბოლოკს (რასაკვირველია უმს : )). მჟავე კიტრს კი ვჭრით პატარა კუბიკებად. ამ ყველაფერს ვაწყობთ ფენებად, ლამაზად, შემდეგი თანმიმდევრობით: კარტოფილი, მჟავე კიტრი, კვერცხი, სტაფილო, ჭარხალი. ფენებს შორის თანაბრად ვანაწილებთ მაიონეზს, სუნელებსა და მარილს (ფრთხილად, მარილი ბევრი არ მოგივიდეთ). ზემოდან შეგვიძლია მოვაყაროთ მწვანილი, სურვილისამებრ.

შუბას აკეთებენ დამარილებული ქაშაყითაც (Селедка), ამ შემთხვევაში წვრილად დაჭრილ ქაშაყს კარტოფილის ფენის ზემოთ მოათავსებთ. შეგიძლიათ ასევე ბოლოს წინა ფენაში (სტაფილოსა და ჭარხალს შორის), უმი, მსხვილად დახეხილი ვაშლიც დაამატოთ, ძალიან უხდება, თუმცა ეს ინდივიდუალური გემოვნების ამბავია

მარი ციმაკურიძე

ბისკვიტი:

2 კვერცხი

50 გ შაქარი

2 ჩ.კ ლიმონის წვენი

1/2 ჩ.კ ლიმონის ცედრა

1 ს.კ. (არასავსე) ზეთი

50 გ ფქვილი

1/2 ჩ. კ. გამაფხვიერებელი ან 1/4 ჩ.კ. სოდა

კრემი:

500 მლ ნაღები (32-38%)

1 ჩ.კ. ლიმონის ცედრა,

4 სავსე სადილის კოვზი შაქარი,

20 მლ ლომონის წვენი

300-350 გ მარწყვი

კრემში ნაღების ჩანაცვლება შეიძლება გემრიელი, ახალი არაჟნითაც, თუმცა, რადგან არაჟანი არ აითქვიფება ,  ცოტა ჟელატინის (დაახლ.2- 4 გრ. ) დამატება მოგიწევთ კრემის სიმყარისთვის. შესაძლოა ჩემი მითიტებული ჟელატინის დოზა არ აღმოჩნდეს საკმარისი, რადგან ყველა ფირმის ჟელატინი არ არის ერთნაირად ძლიერი. პირადად მე მომწონს dr. oetker-ის ფირმის. თუ ჟელატინთან ვერ მეგობრობთ, მაშინ ნაღების ფხვნილი შეათქვიფეთ. ეს კრემს მისცემს მდგრადობას.  რა თქმა უნდა, ნაღების და არაჟნის გემოები განსხვავდება, მაგრამ მე მომისინჯავს იგივე კრემი არაჟნით და ნამდვილად ძალიან გემრიელია.

კვერცხი უნდა იყოს ოთახის ტემპერატურის. მე, თუ წინასწარ გამოღება დამავიწყდა, თბილ წყალში ვალაგებ ცოტა ხნით

გააცალკევეთ გული და ცილა. გულს დაასხით ზეთი და ლიმონის წვენი. ეს მეთოდი ნინო ფანჯაკიძის რეცეპტში ამოვიკითხე და ამ ბისკვიტის ცხობისას გამოვიყენე.  ცილა +მწიკვი მარილი ათქვიფეთ კარგად, შეურიეთ შაქარი და განაგრძეთ თქვეფა. შემდეგ ჩაამატეთ გულები, ასევე, ლიმონის ცედრა.

ბოლოს დააცერით ფქვილი და გამაფხვიერებელი. ამოურიეთ მიქსერის გარშე, დელიკატურად, ქვემოდან ზემოთ მოძრაობებით.

24 სმ დიამეტრიანი ფორმა იდეალური იქნებოდა ამ ბისკვიტისთვის, მაგრამ მე 26 სმ-იანი მაქვს. ქაღალდჩაფენილ,ცხიმწასმულ ფორმაში ჩაასხით ცომი და 170 გრადუსზე გახურებულ ღუმელში გამოაცხეთ. ჩემს ღუმელში დაახლოებით 20 წუთი დასჭირდა.

სანამ ბისკვიტი გაცივდება, კრემი მოამზადეთ. ცედრა,ლიმონის წვენი და შაქარი ერთად აურიეთ და შაქარი რომ უკეთ გადნეს, შეათბეთ. ნაღები ათქვიფეთ მყარი კრემის კონსისტენციამდე, შეურიეთ ლიმონის მასა, კარგად აურიეთ და მაცივარში შეაბრუნეთ.

ბისკვიტი ჩადეთ გვერდებმოსახსნელ ფორმაში, მსუბუქად,ფუნჯით დანამეთ თქვენთვის სასურველი ნარევით. მე გამოვიყენე ჩემივე მომზადებული ციტრუსის ლიქიორისა და მწვანე ჩაის ნარევი.

თანაბარი ზომის მაწყვები შეარჩიეთ და შუაზე გაჭერით, შემოალაგეთ ბისკვიტის გარშემო. ბისკვიტს გადაუსვით კრემის თხელი ფენა, მოაფინეთ დანარჩენი მარწყვი, დაჭრილი, შემდეგ ისევ კრემი და შედგით მაცივარში, კარგად რომ გაცივდეს.

თუ კრემს არაჟნით მოამზადებთ, ცივ წყალში დამბალი ჟელატინი ციტრუსის  შემთბარ მასაში გაადნეთ და ისე გადაურიეთ არაჟანს. დანარჩენი ისე, როგორც ზემოთ აღვწერე.

ზემოდან გააფორმეთ მარწყვით, გახეხილი შოკოლადით,პიტნის ფოთლებით.

ეს მეორე დღეს გადავიღე, მარწყვები ცოტა შელახულია მაგრამ თვითონ ნამცხვრის გემო უკეთესი, უფრო არომატული იყო. კრემსაც კარგად ეჭირა თავი კრემზე თითის კვალი არ შეიმჩნიოთ ჩემი 1 წლის ელენე ცდილობდა ფოტო-სესიის ჩაშლას არა და ბოლო ნაჭერი იყო…

• 1 ჭიქა (250 მილილიტრიანი)  სუშის ბრინჯი   (ეს თბილისშიც იყიდება)
• 1 ჭიქა და მესამედი წყალი
• 2-3 ს.კ ბრინჯის ძმარი
• 2ჩ.კ. შაქარი
• 1/2   ჩ.კ მარილი
• წყალმცენარე ნორი
• ორაგულის ან თინუსის ფილე (მე ორაგულის მომწონს )
• კიტრის ან ავოკადოს ნაჭრები სურვილით

ამას გარდა, იაპონელები იყენებენ ხის თასსა და კოვზს, ბამბუკის საფენს – მაკისუს, მარაოს.

აქედან მხოლოდ ხის კოვზი მაქვს სახლში თუმცა მშვენივრად მოვახერხე სუშის როლების მოხვევა…

ბრინჯი კარგად გავრეცხე, დავასხი წყალი და წამოვადუღე. დავუწიე ცეცხლს მინიმუმამდე და ვხარშე სანამ წყალი დაშრა. ბრინჯი უკვე მზად იყო.  15 წუთით დავივიწყე მოხარშული ბრინჯი და შევუდექი ძმრიანი ნაზავისა და თევზის მომზადებას. ძმარში შევურიე მარილი და შაქარი. კარგად რომ გამდნარიყო, ძმარი რამდენიმე წამით შევათბე მიკროტალღურში თევზი წინასწარ დავჭერი საშუალო ზომაზე, ხოლო კიტრი (შუაგულის ნაწილი არა) ჩხირივით.

15 წუთის გასვლის შემდეგ, ბრინჯი თასში (წესით, ხის) გადავიტანე, მოვასხი ძმრიანი ნარევი და ხის კოვზით ფრთხილად ამოვურიე. ამ დროს, იაპონელები თან მარაოთი უნიავებენ და აგრილებენ ბრინჯს.  როცა ბრინჯი საკმარისად გაგრილდა, ისე რომ ხელს აღარ წვავდა, დავიწყე სუშის გადახვევა.

რადგან ბამბუკის საფენი არ მაქვს, როლები ორად გაკეცილი პირსახოცის დახმარებით გადავახვიე  სხვათა შორის, სულაც არ აღმოჩნდა ძნელი. პირსახოცზე დავდე ნორის ფურცელი, პრიალა მხარე ქვემოთ. სველი ხელებით ავიღე ბრინჯის გუნდები და ზემოდან გავანაწილე. შემდეგ დავადე კიტრისა და თევზის ნაჭერი.

პირსახოცის დახმარებით დავიწყე მჭიდროდ გადახვევა და (მეტნაკლებად) თანაბარი ფორმის მიცემა.

შემდეგ ბასრი დანით დავჭერი და ვუალა!  გემრიელი სუში მზად არის

სუში უნდა მიირთვათ დამარინადებულ ჯანჯაფილთან, ვასაბისთან ან სოიოს სოუსთან ერთად.

p.s. თუ ძალიან გინდათ სუშის გაკეთება,მაგრამ გიჭირთ საჭირო ინგრედიენტების მოძიება თბილისში, შეგიძლიათ მცირედი ცვლილებები შეიტანოთ რეცეპტში. სუშის ბრინჯი სუპერმარკეტებში იყიდება, რამდენჯერმე ვნახე, მაგრამ თუ მაინც ვერ იშოვით, შეგიძლიათ კარგი ხარისხის მრგვალი ბრინჯით შეცვალოთ, მთავარია წებოვნება ჰქონდეს. ხოლო ბრინჯის ძმრის შეცვლა კარგი ხარისხის თეთრი ღვინის  ძმრით შეიძლება.  წყალმცენარე ნორის ნამდვილად ვერ შეცვლით, უბრალოდ შეგიძლიათ სუშის სხვა სახეობა მოამზადოთ, რომელსაც ნორი არ სჭირდება.

შუაგულში ჩასადებად გამოვიყენე ორაგულის ფილე, რომელიც  ამ რეცეპტის მიხედვით მქონდა მომზადებული.

ეს ფირფიტები გამოიყენება Spring roll-ის, ბოსტნეულის მსუბუქი რულეტების და ვიეტნამური  ბლინების nem-ის დასამზადებლად.  მშრალი სახით, ეს ფირფიტები მტვრევადი და მყიფეა, მაგრამ საკმარისია რამდენიმე წამით წყალში დაალბოთ, მაშინვე რბილდება და ადვილად გემორჩილებათ. ბრინჯის ფურცლები დიეტურ პროდუქტად ითვლება, რადგან არ შეიცავს ცხიმს და შაქარს, მდიდარია უჯრედისით და სასარგებლო ნახშირწყლებით. როლები მზადდება მხოლოდ ცოცხალი ბოსტნეულით, ამატებენ ზღვის პროდუქტებს, თევზს, მწვანილს, ხილსაც კი.  ნემი კი ფრიტიურში შემწვარი ბლინია, სხვადასხვა ხორცის გულით. მიირთმევენ  ტკბილ-მჟავე სოუსით  და ითვლება ვიეტნამური სამზარეულოს ყველაზე პოპულარულ კერძად.

მე ჩემი როლები ქათმის ხორცით და ბოსტნეულით მოვამზადე. 1 პაკეტი (100 გ) ბრინჯის ფურცლებისთვის, რომელთაგან რამდენიმე მგზავრობისას გატეხილა, გამოვიყენე:

1 მოზრდილი კიტრი

1 მოზრდილი სტაფილო

1 ნაჭერი ქათმის ფილე

ქორფა წიწმატის ფოთლები

მწვანე ხახვი

სოუსი ქათმის ფილესთვის: 3 ს.კ სოიოს სოუსი, 1 ჩ.კ თაფლი, 1 ს.კ ზეითუნის ზეთი, წითელი წიწაკა, მსხვილად დაფქული.  ნედლი ჯანჯაფილიც მოუხდებოდა მაგრამ არ მქონდა

სოუსში დაამარინადეთ ქათმის ფილე.

პარალელურად მოამზადეთ ბოსტნეული: კიტრი და სტაფილო ძალიან წვრილ ჩხირებად უნდა დაჭრათ. მე ჯერ ბოსტნეულის სათლელით დავჭერი ლენტებად, შემდეგ ჩხირებად. კიტრის თესლიან ნაწილს ნუ მიაყოლებთ.

შეგიძლიათ დაამატოთ კიდევ რამე, მაგალითად , ხშირად ამატებენ ცუკინის (ყაბაყს), სალათის ფურცლებს.  ბრინჯის ვერმიშელს (თბილისშიც იშოვება ),  გაღვივებულ სოიოს .

ტაფა გააცხელეთ და ცხიმის გარეშე დადეთ მარინადიანი ქათმის ფილე, რამდენიმე წამში, ხორცის ზედაპირი რომ შეიკვრება, დაუწიეთ ცეცხლს და საშუალო ტემპერატურაზე შეწვით.  გადააბრუნეთ, დაასხით  დარჩენილი მარინადი და შეწვით. მზა ხორცი დაჭერით წვრილ ჩხირებად.

ყველა საჭირო ინგრედიენტი გამზადებულ დაილაგეთ ახლოს და დაიწყეთ ბრინჯის ფურცლების დალბობა.  თბილ წყალში ჩადეთ სათითაოდ რამდენიმე წამით. რომ დარბილდება და მოქნილი გახდება, გადაიტანეთ სუფთა ხელსახოცზე ან ტილოზე ზედმეტი წყლის შესაშრობად.  დაადეთ ზედ სხვადასხვა ბოსტნეულისა და ხორცის პატარა ულუფა და გადაახვიეთ. საერთოდ, მჭიდროდ უნდა გადაიხვეს, თუმცა მე მთლად ასე არ გამომივიდა

სულ ეს არის  გემრიელია, ადვილი და მსუბუქი. ერთი ეგაა, თბილისში თუ ვიშოვით ამ ფურცლებს…

ორაგულის საშიმი

საშიმი თურმე ხანდახან ქათმისა და ცხენის ხორცითაც მზადდება. პრინციპი იგივეა – ხორცი უმი უნდა იყოს.

აი ამ ბლოგის ავტორმა გოგონამ კი ექსტრემალური საშიმის გასინჯვა გადაწყვიტა და ტოკიოს ერთ-ერთ რესტორანს – “ასადაჩის” ეწვია. აქ ექსკლუზიურ საშიმის ამზადებენ, ბ ა ყ ა ყ ი ს  ხორცისგან.

საჭმელად ჩვეულებრივი, ეზოში დაჭერილი ბაყაყი არ გამოდგება. ამისთვის სპეციალურად დიდი და ეკოლოგიურად სუფთა გომბეშოები გამოყავთ. დასაკლავად გამზადებულ გომბეშოს სამზარეულოში ამყოფებენ და მხოლოდ შეკვეთის მიღების შემდეგ, უშუალოდ კლიენტის თვალწინ კლავენ. გომბეშოს სხეულის ერთი ნაწილისგან საშიმის ამზადებენ, დანარჩენისგან კი – სუპს.

თუ ბლოგის ავტორს ვენდობით (და ისღა დამრჩენია ვენდო, რადგან ამ კერძს საკუთარი ნებით არასდროს გავსინჯავ), სუპიც ძალიან გემრიელია და საშიმიც. ბაყაყის ხორცი ბევრად ნაზია, ვიდრე ქათმის ან თუნდაც თევზის.

“ასადაჩის” მენიუში სხვა უცნაურობებსაც ნახავთ: ღორის ცურს, კვერცხებს და საშოსაც კი. როგორც ჩანს, ამ რესტორანს ძირითადად ის ხალხი სტუმრობს, ვისაც საკუთარი სექსუალური პოტენციის ამაღლებისათვის ოთხფეხების სასქესო ორგანოების მირთმევის დადებითი ეფექტების სჯერა. ასეთი კი, აზიურ კულტურაში, საკმაოდ ბევრია (ამაზე ადრეც ვწერდით, იხილეთ პოსტი ჩინური დელიკატესის შესახებ)

თუ ზემოთ წაკითხულმა დაგაინტრიგათ, აუცილებლად უნდა ნახოთ ეს ვიდეოები. მაგრამ თუ სუსტი გული გაქვთ, პირდაპირ ავტორის ბლოგს ესტუმრეთ და ფოტოების ნახვით დაკმაყოფილდით, ბევრად იოლად გამოხვალთ

(c) information and videos from Rocket News has been used for this post. Many thanks to the authors.

გასაკეთებლად უმარტივესია! მხოლოდ უნდა შეურიოთ ინგრედიენტები და შედგათ ღუმელში, თქვეფაც კი არ სჭირდება არაფერს შეგიძლიათ მაქსიმუმ 30 წუთში უგემრიელესი დესერტით გაუმასპინძლდეთ მეგობრებსა თუ ოჯახის წევრებს. ასევე, შესაძლებელია წინასწარ მომზადებული ცომი მაცივარში ფორმებიანად შეინახოთ (შეიძლება გაყინვაც, სილიკონის ფორმებით) და შემდეგ უცბად გამოაცხოთ.

ინგრედიენტები გაკუთვნილია 4 ულუფისთვის, თუმცა მე 6 სილიკონის ფორმა შევავსე. ანუ რაოდენობა დამოკიდებულია საცხობი ფორმის ზომაზე.

80 გ შოკოლადი

50 გ კარაქი

30 გ ფქვილი

2 კვერცხი

40 გ შაქარი

შოკოლადი და კარაქი გაადნეთ ორთქლზე ერთგვაროვანი მასის მიღებამდე.

კვერცხები ათქვიფეთ შაქართან ერთად და ჩაამატეთ მასში შოკოლადის მასა.

დააცერით ფქვილი და მოურიეთ.

გაანაწილეთ კარაქწასმულ ფორმებში (მე ნახევარზე ცოტა მეტი ჩავასხი)  და შედგით 200-210 გრადუსზე გახურებულ ღუმელში 8 წთ. ამის შემდეგ გამოიღეთ, 3-4 წთ დააცადეთ და ფრთხილად ამოიღეთ ფორმებიდან.

მიირთვით მაშინვე, ნაყინის ბურთულასთან ერთად. უხდება კენკრაც: მარწყვი, ჟოლო…

პ.ს.  რამდენიმე დეტალი აუცილებლად გაითვალისწინეთ: ყველა ღუმელის ტემპერატურა მეტ-ნაკლებად განსხვავდება, ამიტომ უკეთესი შედეგის მისაღებად, სჯობს ჯერ ერთი ცალი გამოაცხოთ და შემდეგ სათანადო ცვლილებები შეიტანოთ ცხობის დროში და ტემპერატურაში, თუ საჭიროდ ჩათვლით, რასაკვირველია.

საერთოდ, ეს ნამცხვარი კერამიკის ფორმებში ცხვება, თუმცა იყენებენ მეტალის და სილიკონის ფორმებსაც. მე სწორედ სილიკონის გამოვიყენე.  ყველა ფორმა სხვადასხვანაირად ანაწილებს ტემპერატურას, მეტალს და კერამიკას ცოტა მეტი დრო სჭირდება, ვიდრე სილიკონს. მე რეცეპტის მიხედვით 10 წთ ვაცხვე 210 გრადუსზე, ვფიქრობ, ჩემი ღუმელისთვის ეს დრო ბევრია,მინდოდა უფრო თხევადი გული ჰქონოდა .  სწორედ ამიტომ სხვა დროს 7-8 წუთზე გამოვიღებ.  გარეგნულად რომ მიხვდეთ, ქერქი უნდა შეუცხვეს და შუაგულთან კრემოვანი უნდა დარჩეს.

პ.პ.ს.  აქვე მივაწერ გამოცდილი კულინარის, ნათია მინაშვილის რჩევას: “ჩემი გამოცდილებით და ხშირად ვაკეთებ – “თავზე უნდა ადგე” ცხობისას, წამებში ცხვება და ძალიან ინდივიდუალურია ღუმელის, ტემპერატურის, საცხობი ფორმის და ცომის გაცივების ტემპერატურის მიხედვით.. ცომი თავიდან არ უნდა იყოს თხელი, ცომი თუ ზედმეტად თხელი იქნა, პირიქით, ცხობის დრო გაიზრდება და სველი კრემი, რაც უნდა დარჩეს, არ იქნება სველი და ჰაეროვანი, მუსივით…”

აუცილებლად გამოგადგებათ, თუ ოჯახში ბავშვები გყავთ, რომლებსაც რძის, მაწვნის ან შვრიის ფაფის ცალკე ჭამა ეზარებათ. რასაკვირველია, ნედლი შვრიის სასარგებლო თვისებები გრანოლაში შემცირებულია, მაგრამ არც იმდენად, როგორც მაღაზიაში ნაყიდ და კონსერვანტებით გაჯერებულ Corn Flakes-სა და მსგავს ე.წ. საბავშვო ტკბილ-მარცვლეულ-ბურღულეულში.

თავისთავად შვრია, ძალიან სასარგებლო მარცვლეულია (დაწვრილებით მისი სასარგებლო თვისებების შესახებ იხილეთ პოსტში: “ჰერკულესის” ფაფის საიდუმლო), თუმცა, ბუნებრივია, ყოველთვის არ ვართ უშაქრო და უმარილო, ჯანსაღი ფაფის ჭამის განწყობაზე. ასეთ შემთხვევაში კი გრანოლა იდეალური არჩევანია.

გრანოლას საკმაოდ ბევრი რეცეპტი ვნახე ინტერნეტში და ვეცადე, შემეჯერებინა. საბოლოოდ კი, იმ ინგრედიენტებით (და იმ პროპორციებით) გავაკეთე, რაც ჩემს გემოვნებას შეესაბამებოდა.

მე გამოვიყენე:

• შვრიის ფანტელი – 5 საშუალო ზომის ჭიქა (მსხვილი ფანტელები ჯობია)
• შაქარი – 1 ს.კოვზი
• თაფლი – 3 სავსე ს/კ (ნეკერჭხლის სიროფსაც იყენებენ, მე არ მქონდა, თან თაფლი ყველაზე სასარგებლო რამაა ამქვეყნად<3)
• ზეთი – 1/3 ჩ.ჭ.
• მზესუმზირა, მოუხალავი და უმარილო – 3 ს.კ
• სეზამის მარცვლები – 2 ს.კ
• ფორთოხლის ცუკატები – 2 ს.კ
• ნუშის ფანტელები – 2 ს.კ
• ვანილი
• მარილი – 1/3 ჩაის კოვზი
• ქიშმიში – 1/3 ჩ.ჭ.
• დაფქული დარიჩინი და დაფქული ჯანჯაფილი – 1/2 ჩ.კ.

ერთ შეხედვით, ბევრი ინგრედიენტია. თუმცა თქვენ შეგიძლიათ ის გამოიყენოთ, რაც გიყვართ ან სახლში გაქვთ (ნუში, თხილი, ქოქოსის ფანტელი, ჩირები და ა.შ.), მთავარია, ძირითადი ინგრედიენტები (შვრია, თაფლი, ზეთი, ვანილი და კიდევ რამე, დასატკბობი) გქონდეთ.

თავდაპირველად თასში ჩავყარე შვრია და შევურიე შაქარი, მარილი, მზესუმზირა, დათლილი ნუში და სეზამის მარცვლები. კარგა ხნის წინ გაკეთებული და მაცივარში შენახული ფორთოხლის ნახევრადგაყინული ცუკატები გამოვიღე და ორიოდე სუფრის კოვზი ბლენდერში დავფქვი (საკმაოდ დიდი ნაჭრები იყო და ჩემი აზრით, ამ ფორმით არ მოუხდებოდა).

პარალელურად, პატარა ჭურჭელში გავადნე თაფლი (ცოტა სქელი თაფლი მქონდა და სხვაგვარად კარგად არ შეერეოდა), დავუმატე ზეთი, ვანილი, ჯანჯაფილი და დარიჩინი და ეს ყველაფერი მოვასხი თასში არეულ ინგრედიენტებს. ქიშმიში ჯერ არ შეურიოთ. ამის დროც მოვა.

ამასობაში 220 გრადუსამდე გავახურე, თუნუქის ტაფაზე დავაფინე პერგამენტი (კალკა) და ერთმანეთში წინასწარ ძალიან კარგად არეული მასა ქაღალდზე გავშალე.

ღუმელში თავდაპირველად 10 წუთით შევდგი, შემდეგ გამოვიღე, კარგად ავურიე და ისევ შევდგი, მომდევნო 10 წუთით. შემდეგ ისევ ავურიე, ამჯერად უკვე გარჩეულ ქიშმიშთან ერთად და ბოლო 10 წუთიც დავტოვე ღუმელში, ოღონდ ცეცხლს დავუწიე, 170 გრადუსამდე. ამ დროს ყურადღებით უნდა იყოთ, რომ შვრია არ დაიწვას, მხოლოდ უნდა მოიხალოს და გაოქროსფერდეს, სხვაგვარად სასარგებლო აღარაფერი შერჩება.

როგორც კი ქიშმიშები დაიბერება და გამუქდება, სასწრაფოდ გამოიღეთ, არ დაიწვას. გამზადებული გრანოლა დიდ თასში გადავიტანე და გავაგრილე. აი ამ წუთებში კი სრულად გაციებული, გადამაქვს მჭიდროდ თავდახურულ ჭურჭელში, მაცივარში შევინახავ და დილაობით მივირთმევ ხოლმე, ან სულაც სამსახურში წავიღებ

თუმცა, რა თქმა უნდა, ვერ მოვითმინე და მიუხედავად იმისა, რომ საკმაოდ გვიანია, მაინც გეახელით, ცივ მაწონთან ერთად. ვერ წარმოიდგენთ, როგორი გემრიელი იყო )

ბოდიში მობილურით გადაღებული ფოტოსთვის. როგორც კი ფოტოაპარატი მექნება, ხელახლა გავაკეთებ და უფრო კარგი ფოტოებით დაგიბრუნდებით

• 1 ჭ ფქვილი
• 1 კვერცხი
• 120 გ რძე
• 1-2 ს.კ შაქარი
• ანანასის კომპოტი
• ცოტა სოდა ან გამაფხვიერებელი (სოდა ყოველთვის გამაფხვიერებლის ნახევარი დოზა აიღეთ)
• ვანილი

კომპოტიდან ამოიღეთ ანანასის ნაჭრები და ზედმეტი წვენისგან დაწურეთ.

ხელის სათქვეფით შეურიეთ ერთმანეთს რძე, კვერცხი და შაქარი. დაამატეთ გაცრილი ფქვილი, ვანილი და სოდა. ამოავლეთ ცომში ანანასის ნაჭრები და ზეთიან ტაფაზე შეწვით, როგორც ჩვეულებრივ ბლინებს წვავთ.

მზას მოაფრქვიეთ შაქრის პუდრა

ამის მსგავსადვე ვაკეთებ ვაშლიან ბლინებს. ამოუღეთ ვაშლს გული, გათალეთ და დაჭერით მრგვალ ფირფიტებად,0.5 მმ-ზე.  რომ არ გაშავდეს შეგიძლიათ ლიმონის წვენი მოასხათ. ვაშლზევე მოაფრქვიეთ დარიჩინი, ამოავლეთ ცომში და შეწვით ზეთიან ტაფაზე, შედარებით დაბალ ცეცხლზე. ასე ვაშლი მოასწრებს დარბილებას და უფრო გემრიელია.

ძალიან საინტერესო რეცეპტია, მზადდება 2  სახის ცომი, შემდეგ ერთიანდება და საკმაოდ საინტერესო შედეგს ვიღებთ  ძალიან სწრაფად მზადდება, რბილია და გემრიელი.

რეცეპტის ეკუთვნის www.perfectcook.org-ის ერთ-ერთ ავტორს, იას. იგი, იმის გარდა რომ შესანიშნავი კულინარია, არაჩვეულებრივ ფოტოებსაც იღებს  შეგიძლიათ თავადაც დარწმუნდეთ, თუ ამ ბმულს ეწვევით   

რეცეპტსაც ზემოთ მითითებული ბმულიდან დავაკოპირებ და შემდეგ ჩემს გამოცდილებას გაგიზიარებთ.

”პირველი ცომი:

• 320გრ ფქვილი
• 1ჩ/კ გამაფხვიერებელი
• 2 ს/კ ზეთი
• 177 გრ თბილი წყალი (გრამებში გადმოყვანისას ეს ციფრი მივიღე)
• მოზილეთ ცომი, დაასვენეთ 20 წთ

მეორე ცომი:

• 192 გრ გქვილი
• 75 გრ კარაქი
• 3 ს/კ ცივი წყალი

ამ ცომს არ სჭირდება დასვენება.

მოზილეთ ორივე ცომი რეცეპტში მითითებული ინგრედიენტების მიხედვით.

პირველი ცომი გაიყვანეთ ტაფის ხაჭაპურის ზომაზე, გულში ჩაუდეთ მეორე ცომი. მოუკარით ცომს თავი .

ამჯერად ცომი გაიყვანეთ მართკუთხედის ფორმაზე, დაახლოებით 20/30 სმ.

დაახვიეთ რულეტივით.

ღვეზელის მოსამზადებლად დაჭერით ცომის რულეტი რგოლებად. დაახ. 1 სმ.

ცომის რგოლი გააბრტყელეთ, ჩადევით თქვენთვის სასურველი გულსართი, მოუკარით ნაპირები და შეწვით ცხელ ზეთში.

გულსართი შეიძლება იყოს: ხორცეული, კარტოფილი და სხვა ბოსტნეული, მარცვლეული და ყველი”

პირველ ცომის რეცეპტში მითითებული 177 გ წყლის ნაცვლად მე 200 მლ დავამატე.  ასევე ცოტა მარილიც .  ცომი არის ძალიან სასიამოვნო სამუშაო, რბილი და ელასტიური.

მეორე ცომი რეცეპტის მიხედვით მოვამზადე. ასე სკრუპულოზურად თუ ვერ აწონით ფქვილს, არაფერი დაშავდება, 200 გ შეგიძლიათ გამოიყენოთ.   ასე გამოიყურება გასაბრტყელებლად გამზადებული ცომი

შიგთავსი ნაწილს ლობიანის გული ჩავუდე, ნაწილს მოხარშული კვერცხისა და ყველის ნარევი.

რამდენიმე სიტყვას შეწვის მეთოდზეც ვიტყვი. ავტორის ფოტოები რომ ძალიან ლამაზი და მადისღმძვრელია, დამეთანხმებით ალბათ  განსაკუთრებით ცომზე გაჩენილმა პატარა ბუშტუკებმა მომხიბლა

ჩემი ღვეზელები ასეთივე ლამაზი ვერ გამოვიდა, მაგრამ  ძალიან გემრიელი კი იყო.  თავიდან ბუშტუკები არ უჩნდებოდა, იმის მიუხედავად რომ ჩემი აზრით საკმარისად ბევრი ზეთი დავასხი. შემდეგ ზეთი კიდევ  მივამატე და ბუჭტუკებიც გამოჩნდა   მოკლედ, დავასკვენი რომ ზეთი უნდა იყოს, თითქმის ღვეზელის ნახევარზე ზემოთ, ცომის შეერთების ადგილამდე მაინც, როგორც მინიმუმ. ღვეზელი უნდა იხარშემოდეს ამ ცხელ ზეთში. იდეალური იქნება, თუ შესაწვავად მაღალ და ვიწრო ჭურჭელს აირჩევთ, ასე ზეთსაც დაზოგავთ და ცხიმის შხეფებსაც აიცილებთ გარშემო. გამომცხვარი ღვეზელები ქაღალდის ხელსახოცზე დაალაგეთ ზედმეტი ცხიმის შესაშრობად.

აუცილებლად სცადეთ ,  მოგეწონებათ

რეცეპტისთვის სახელის დარქმევა გამიჭირდა, რამდენიმე საინტერესო იდეა მომაწოდეს, მათ შორის, ”ზარმაცების აჭარულიც” , რაღაცით მართლაც გავს აჭარულ ხაჭაპურს, მაგრამ ქათმის ხორცს შეიცავს და გადავიფიქრეთ )  მოკლედ, დაარქვით რაც გინდათ, მთავარია მოგეწონოთ

ერთ ადამიანზე თითო ასეთი პურია გათვალისწინებული.  მე ჰამბურგერებისთვის განკუთვნილი ფუნთუშა და შირნჰოფერში ნაყიდი უგემრიელესი მინი-პური  გამოვიყენე. პურით უფრო მომეწონა, რადგან ფუნთუშას მოტკბო გემო დაჰყვებოდა და არ მომეწონა მთლიანობაში.

ერთი პურისთვის დაგჭირდებათ

2-3 მწყრის კვერცხი ან 1 ქათმის

გახეხილი ყველი

ქათმის ხორცი (მოხარშული,შემწვარი), ან ძეხვის/ბეკონის ნაჭერი

მარილი და პილპილი გემოვნებით

პურს წააჭერით თავი და ამოუღეთ გული შუამდე. შეგნით ჩადეთ ხორცი/ძეხვი/ბეკონი და ყველი . შედგით 200 გრადუსზე ღუმელში, როგორც კი ყველი ჩაადნება, ღუმელიდან გამოიღეთ, ჩაახალეთ კვერცხი და შეაბრუნეთ. კვერცხის ცილა რომ შეიკვრება და გათეთრდება, მზადაა.

პურის  გულში ჩასადებ ინგრედიენტებს, შეგიძლიათ მიამატოთ კიდევ რამე

ყველამ იცით ე.წ. “გლაზუნიები” (Глазунья), მაგრამ იცით როგორ არის ქართულად? ან სიტყვის ქართულ წარმოშობაზე თავს ვერ დავდებ, თუმცა ასე უწოდებდნენ ძველად ამ კერძს.

კერძი და სახელწოდებაც ქართველთა ამხანაგობის გამოცემულ წიგნში ვიპოვე, რომელიც 1903 წლით თარიღდება.

რეცეპტს გთავაზობთ სტილის დაცვით:

“სამი სტოლის კოვზი ერბო გააცხელეთ ტაფაში, კვერცხი გატეხეთ და ჩააგდეთ მთლივ, კიდევ გატეხეთ და ჩააგდეთ, ასე ხუთი–ექვსი კვერცხი; როდესაც მოიხრაკოს, მარილი მოაყარეთ და მიირთვით.

მასალად საჭიროა:

სამი სტოლის კოვზი ერბო

ექვსი კვერცხი

* * *

შანთრაქი ადუღებულ წყალშიაც კეთდება უერბოოდ”

მე ერბო არ მქონდა და 1 სუფრის კოვზი კარაქი გამოვიყენე  :)

ასე მოვამზადე წინასწარ სამი კვერცხი

ტაფაში ჩავუშვი ერთიანად

შანთრაქი

 პ.ს. ვისაც კვერცხის შეწვის გამოცდილება არ გაქვთ ჯერ ტაფა გააცხელეთ  

Filed under: ქართული Tagged: კვერცხი, ქართველთა ამხანაგობა, შანთრაქი, ძველი ქართული კერძები, food ]]> http://ratatui.me/2012/05/14/shantraki/feed/ 3 foodiefromgeorgia umi tafaze shantraki http://ratatui.me/2012/05/14/mwvanilis-sousi-spagetistvis/ http://ratatui.me/2012/05/14/mwvanilis-sousi-spagetistvis/#comments Mon, 14 May 2012 18:53:28 +0000 ნინო ჯანანაშვილი http://ratatui.me/?p=2177 Read More →]]> ყველაზე მარტივი სოუსი, რაც კი შეიძლება სპაგეტის მოუმზადოთ, ჩემი აზრით, არის პესტო.  ესაა ცნობილი იტალიური სოუსი, რომლის საბაზო ინგრედიენტებია ზეითუნის ზეთი, რა თქმა უნდა ბაზილიკი, ყველი პარმეზანი, კედარის კაკალი.  მე მხოლოდ საქართველოში ნაყიდი პესტო გამისინჯავს, მაგრამ დარწმუნებული ვარ, მზიან იტალიაში, ახალმომზადებულს რომ მოასხამენ ასევე იქვე მოზელილი ცომისგან მოხარშულ სპაგეტის, სულ სხვა გემო და არომატი ექნება…

ქოთანში დათესილი ჩემი ბაზილიკი, მართალია ამოვიდა და იზრდება კიდეც, ჯერ მაინც არაა ისეთი,მოკრეფა რომ შეიძლებოდეს. ამიტომ სანამ ნამდვილ იტალიურ პესტოს გავაკეთებ,  სხვა მწვანილებზე ვატარებ ექსპერიმენტებს.  ამ მწვანილის სოუსსაც ქართული პესტო ვუწოდე, ისე, პირობითად…

1 კონა ოხრახუში

4-5 ქორფა მწვანე ხახვი

100 მლ ზეითუნის ზეთი (ან ნარევი მზესუმზირის ზეთთან)

1-2 კბილი ნიორი (სიდიდის  მიხედვით)

მარილი, შავი პილპილი

ლიმონის წვენი, სურვილით

გარეცხილი და წყლისგან შემშრალი მწვანილები, ნიორი, ზეთი მოათავსეთ ბლენდერში და ერთიან მასად აქციეთ. დაამატეთ მარილი და პილპილი გემოვნებით. ამჯერად მესამედი ლიმონის წვენიც ჩავაწურე.  ჩემთან ყველას მოეწონა.

მე ზეითუნის ზეთს ცოტა ყურძნის წიპწის ზეთი შევურიე, თუმცა მზესუმზირის ზეთთან ერთადაც გამიკეთებია და ორივე კარგია. მთავარია ზეითუნის ზეთი ნახევარი მაინც იყოს.

ზოგჯერ ყველსაც ვამატებ, ჩვეულებრივს, ქართულს.  ასევე ხმელ ბაზილიკს (სანამ ნედლი მექნება ).  მინდა ვცადო ნედლი პიტნითაც, შედეგებზე აუცილებლად მოგიყვებით

სპაგეტის ძალიან უხდება. ასევე კარგია უცხიმო ხორცეულთან. დარჩენილი სოუსი შეგიძლიათ მოათავსოთ მინის ჭურჭელში და თავდახურული შეინახოთ მაცივარში რამდენიმე დღე. კარგად ინახება.

როგორც ჩვენი ბლოგის ფეისბუქის გვერდზე გითხარით, ამ სასმელის გაკეთების იდეა  გადაცემა “შუა დღის”  კულინარიული ფოტოების თვალიერებისას  გამიჩნდა. იქ რამდენიმე რეცეპტი დევს, ცოცხალი ხილით და სხვა არომატული მცენარეების გამოყენებით. რადგან ახლა მარწყვის სეზონია და ყველას მიუწვდება ხელი ამ ხილზე,სწორედ მარწყვი ავირჩიე თან როგორ მიყვარს!  მართლა ძალიან გემრიელი გამოვიდა და აუცილებლად გავაკეთებ სხვა კომბინაციებსაც

2  ჩ.ჭ მარწყვი

1 კონა პიტნა

2 ნაჭერი ლიმონი

4 ს.კ შაქარი

ყინული

3 ჭ ცივი წყალი (750მლ)

გარჩეული მარწყვი, შაქარი და პიტნის დაჭრილი ფოთლები (ღეროს გარეშე) მოათავსეთ ერთად და დასრისეთ. მე კარტოფილის საჭყლეტი გამოვიყენე ამისთვის.   გრაფინში ჩაასხით ეს მასა, დაამატეთ ყინულის კუბები, 4-ად გაჭრილი 2 ნაჭერი ლიმონი, ცივი წყალი და კარგად ამოურიეთ.

გემრიელად მიირთვით

პ.ს. ხილისა და პიტნის ნაჭრებს ჩემთვის დისკომფორტი არ შეუქმნია, მაგრამ თუ ვინმეს არ უყვარს, შეუძლია დასხმისას გაწუროს.

მოკლედ, თქვენ შეგიძლიათ ფრისე მოიძიოთ, ან ჩვეულებრივი, ჩვენში გავრცელებული სალათით შეცვალოთ. მე კი ქორფა წიწმატითა და ისპანახით ჩავანაცვლე

2 ულუფისთვის:

პატარა კონა სალათი ფრისე (ჩემს შემთხვევაში წიწმატი და ისპანახი)

2 მოხარშული კვერცხი

4 ნაჭერი ბეკონი (მეტიც შეგიძლიათ, სურვილის შემთხვევაში)

სოუსი: 1/2 ჩ.კ.  მდოგვი, 1 ს.კ  ხარისხიანი ძმარი, 2-3 ს.კ ზეითუნის ზეთი, შავი პილპილი, ახალდაფქული.

ბეკონი დაჭერით და უცხიმოდ შეწვით გაცხელებულ ტაფაზე. გადაიტანეთ ქაღალდის ხელსახოცზე,ზედმეტი ცხიმისგან დასაწრეტად.

გარეცხილ-გამშრალებული ფოთლები გადაიტანეთ თასში ან ღრმა ტეფშზე, მოასხით სოუსის ნაწილი და ამოურიეთ. დაამატეთ ბეკონი და მოხარშული კვერცხი,მოასხით დარჩენილი სოუსიც.

მიირთვით მაშინვე.

მარილის ნუღარ დაამატებთ, რადგან მდოგვიც შეიცავს და ბეკონიც. კვერცხი კი სასურველია თოხლოდ მოხარშული იყოს, წიგნში მითითებულია ხარშვის დრო – 6 წთ. ჩემს ფოტოებზე აღბეჭდილ კვერცხს ზედმეტი მოუვიდა ხარშვა

ძირითადი ინგრედიენტებია:

400 გ სავოიარდის ორცხობილა

300 გ ხაჭო (6%)

400 მლ არაჟანი + ნაღების ფხვნილი

ვანილი

დასანამად  ყავა+ვისკი ან ალუბლის წვენი+ვისკი

ხაჭო გავატარე საცერში, ცივი არაჟანი კი ნაღების ფხვნილთან ერთად ავთქვიფე.  საერთოდ, უკეთესი იქნებოდა ასათქვეფი თხევადი ნაღები გამომეყენებინა არაჟნისა და ფხვნილის  ნაცვლად, მაგრამ არ მქონდა. მინდა გითხრათ, ესეც მშვენიერი ვარიანტი იყო, გემრიელი და ხელმისაწვდომი  ნაღების ფხვნილი დაახლოებით 1 ჭიქა შეურიეთ და თუ თხელი მოგეჩვენოთ, მერე შეამატეთ ცოტ-ცოტა. შეურიეთ ერთმანეთს ხაჭოსა და არაჟნის მასა, დაამატეთ ვანილი და თუ საჭიროდ ჩათვლით, შაქრის პუდრაც.

ბისკვიტების დასანამად ზემოხსენებული ორივე ვარიანტი გამოვიყენე.  ჩემი აზრით ყავა ამ შემთხვევაში დიდად არ მოუხდა. ყოველ შემთხვევაში, მე მეორე ვერსია უფრო მომეწონა. მეორე კი იყო ასეთი: უკურკო ალუბლის მურაბა მქონდა, რომელსაც ძალიან კარგად ვიყენებ დესერტებში. ამ მურაბის წვენს დავამატე ცოტა ვისკი და ამ სითხეში 2-3 წამით ჩავდე სავოიარდის ორცხობილები. ჩავალაგე გვერდებიან ფორმაში მჭიდროდ, გადავუსვი კრემი, დავალაგე ალუბლებიც და დავადე მეორე ფენა ბისკვიტები. შემდეგ ისევ კრემი. თავზე შოკოლადის ბურბუშელა მოვაყარე, კაკაოც შეიძლება, რასაკვირველია, როგორც ნამდვილ ტირამისუს ერთი ღამით მაცივარში შედგით, შემდეგ კი დააგემოვნეთ

შოკოლადის ბურბუშელის ასათლელად ვიყენებ ბოსტნეულის სათლელს. შოკოლადი უნდა იყოს ოთახის ტემპერატურის, უფრო რბილად იფხიკება, მაგრამ სწრაფად უნდა იმუშაოთ, ხელებში რომ არ ჩაგადნეთ. იყიდება სპეციალური საკონდიტრო შოკოლადის ფილები, რომელიც უფრო რბილია და ზედგამოჭრილია დეკორისთვის, ცალკე საჭმელად არ ღირს მისი გამოყენება, ჩემი აზრით.

ახლა უკვე მარწყვის სეზონიცაა, ვფიქრობ  მოუხდება ამ დესერტს

და ბოლოს, მიუხედავად იმისა, რომ იტალიურ , ნამდვილ ტირამისუსთან არაფერი აქვს საერთო (სავოიარდის ბისკვიტების გარდა ) მაინც საკმაოდ გემრიელი დესერტია, თან უფრო იაფიც დაგიჯდებათ მისი მომზადება )

მე გამოვიყენე:

10 ცალი დიდი ქამა სოკო

10 ცალი მწყრის კვერცხი

1-2 ნაჭერი ყველი (მე სულგუნი მქონდა)

1 ჩ.კ. კარაქი

რამდენიმე ღერი ოხრახუში

საჭიროების მიხედვით მარილი

სოკოებს ფეხები მოაცალეთ, ქუდები კი ან სწრაფად გარეცხეთ ცივ წყალში, ან სველი ჩვრით გაასუფთავეთ (ფრანგი მზარეულები სწორედ ასე იქცევიან, თუმცა მე მაინც ვრეცხავ).  შეაშრეთ.

ყველი წვრილად გახეხეთ, შეურიეთ დაჭრილი ოხრახუში და დარბილებული კარაქი. აურიეთ ეს მასა რომ შეიკრას. კარაქი ცოტა მეტიც შეიძლება, მაგრამ მე მოვერიდე ზედმეტ კალორიებს, ისედაც საკმაოდ გემრიელი გამოდის. თქვენ თავად გადაწყვიტეთ.  თუ ყველი მთლად უმარილოა ან თვლით რომ არასაკმარისი სიმლაშე აქვს, ცოტა მარილიც მიამატეთ.

სოკოს ნაპირებზე  ”შემოუშენეთ”  ყველის კედელი, შუაგულში კი დატოვეთ სიცარიელე

აქ კვერცხი უნდა მოათავსოთ.

თავზე, თუ გნებავთ, პილპილიც მოაფრქვიეთ.

შედგით 200-220 გრადუსზე გახურებულ ღუმელში დაახლოებით 10 წუთი. ყველი რომ დაადნება და კვერცხის ცილა შეიკვრება. შეგიძლიათ ზემოდან გრილითაც მობრაწოთ. მიირთვით მაშინვე, თბილი.

ეს გემრიელი და არომატული ხილი იდეალურია მათთვის, ვინც ფორმის შენარჩუნებაზე ზრუნავს. 100 გრ მარწყვში მხოლოდ 35 კკალორიაა, ამასთან იგი მინერალებისა და ვიტამინების ნამდვილი საბადოა. 150 გრამიანი ულუფა მოზრდილი ადამიანისთვის საკმარის ც ვიტამინის, რკინის, კალციუმის და მაგნეზიუმის დღიურ ნორმას შეიცავს. გარდა ამისა, იგი ფოლის მჟავის, იგივე ბ9 ვიტამინის წყაროა და განსაკუთრებით ორსულებისთვისაა რეკომენდირებული.
მარწყვი მალფუჭებადი და სათუთი ხილია, დიდხანს არ ინახება, ამიტომ მისი  ყიდვისას, გაითვალისწინეთ, რომ ნაყოფი უნდა იყოს მშრალი, მკვრივი, პრიალა, ხასხასა წითელი ფერის. სასურველია უშუალოდ მოხმარების წინ გარეცხოთ, თანაც სწრაფად, გამდინარე  წყალში რადგან სინოტივეს ცუდად იტანს, წყლით იჟღინთება და სასარგებლო თვისებების ნაწილსაც კარგავს.  თუ თქვენს ეზოში მარწყვი ხარობს, გეცოდინებათ, რომ მისი მოკრეფა სასურველია ადრე  დილით, სანამ მზე ნაყოფს გაათბობს.
მარწყვით უამრავი გემრიელი დესერტის მომზადება შეიძლება: ნაყინი, ნამცხვარი, ტორტი, კრემი, ხილის სალათები , მურაბები, მარმელადები, ჟელე, ალკოჰოლიანი და უალკოჰოლო სასმელები,  კოქტეილები.. . მათ ნაწილს აქაც აღმოაჩენთ . მარწყვი გაყინვას ცუდად იტანს და გალღვობისას მისი სტრუქტურა იცვლება, ასეთი ხილით მხოლოდ წვენს ან პიურეს თუ მოამზადებთ, რომელსაც შემდეგ სხვა დესერტის დასამზადებლად გამოიყენებთ (მუსის, ნაყინის)
ტყის მარწყვის ნაყოფი უფრო მცირე ზომისაა და უფრო არომატულიც. იგი  გავრცელებულია ტყეებში, ტყის პირებში, მდელოებში, მშრალ ბალახოვან ფერდობებზე და ბუჩქნარებში.
ნედლეულად იყენებენ ნაყოფს, ფოთლებს და ფესვებს. ნაყოფს აგროვებენ სრული სიმწიფის დროს. ფოთლებს კრეფენ ყუნწების გარეშე ყვავილებისა და ნაყოფის დამწიფების პერიოდში. ფესვებს აგროვებენ შემოდგომით, აცილებენ წვრილ ფესვებს და აშრობენ.უნდა გახსოვდეთ, რომ ზოგიერთ ადამიანში მარწყვმა შეიძლება გამოიწვიოს ჭინჭრის ციების მსგავსი ალერგიული გამონაყარი.

ტყის მარწყვის ხილი ნაყოფი შესანიშნავი დიეტური პროდუქტია. იგი, როგორც სამკურნალო საშუალება, გამოიყენება ჰიპერტონული დაავადების, ათეროსკლეროზის, კუჭის წყლულის, გასტრიტების,  გაუვალობის, ანემიის, ნიკრისის ქარის და ორგანიზმში ნივთიერებათა ცვლის დარღვევის შემთხვევაში. არსებობს ვერსია, რომლის მიხედვითაც მსოფლიოში ცნობილმა ბოტანიკოსმა კარლ ლინეიმ თავი ნიკრისის ქარისაგან განიკურნა ტყის მარწყვის ნაყოფით.
სამკურნალოდ არ შეიძლება გამოყენებული იქნეს მწვანე მარწყვი (Fragaria viridis Duch), რომელიც ამავე რაიონებში ხარობს, რომელშიც იზრდება ტყის მარწყვი, მაგრამ გვხვდება უფრო გაშლილ, სწორ, ბალახოვან ფერდობებზე. მისი ნაყოფი ბურთისებრია, მოყვითალო-თეთრი, წითლდება მხოლოდ წვერში და ძნელად სცილდება ყვავილსაჯდომს.

ორი ულუფისთვის გამოვიყენე ეს ინგრედიენტები რასაც ფოტოზე ხედავთ

1/2 პაკეტი  სპაგეტი

1 თავი ხახვი

ქამა სოკო

მწვანე ხახვი და რამდენიმე ღერი ოხრახუში

200 გ არაჟანი

მარილი, შავი პილპილი

მარილიან წყალში მოხარშეთ სპაგეტი.

პარალელურად,ასევე მარილწყალში 2-3 წუთით წამოადუღეთ ბროკოლი და გადაწურეთ.

ცოტა ზეთში  მოშუშეთ სოკო და ხახვი. მე ავარჩიე მაქსიმალურად წვრილი სოკოები, რომელიც დაჭრის გარეშე მოვამზადე. დაასხით არაჟანი და დაბალ ცეცხლზე წამოადუღეთ, ჩაამატეთ გადაწურული (წყალი არ გადაავლოთ) სპაგეტი და ბროკოლი. კარგად ამოურიეთ და დაამატეთ პილპილი, მარილიც, თუ საჭიროა და დაჭრილი მწვანილი მოაყარეთ.

მარხვის პერიოდში არაჟნის გარეშეც შეიძლება. მაგრამ უფრო გემრიელი რომ იყოს, ზეითუნის ზეთი გამოიყენეთ.   არაჟნის ნაცვლად კი დაბალპროცენტიანი ნაღებიც შეიძლება, უკეთესიც კი იქნება

2 ულუფისთვის:

2-3 კიტრი (ზომის მიხედვით)

1-2 კბილი ნიორი

1 ჩ.კ. ხმელი პიტნა

1 ჩ.კ კარგი ხარისხის ღვინის ძმარი

2.ჩ.კ. ზეითუნის ზეთი

მარილი

პილპილი (ჩემი ინიციატივით დავამატე)

კიტრი დაჭერით ძალიან თხლად. მე ბოსტნეულის სათლელით დავჭერი ასეთ გრძელ ”ზონრებად”.    მოაყარეთ დაფშვნილი ხმელი პიტნა (მშრალი ხელისგულებით მოფშვნიტეთ), წვრილად დაჭრილი ნიორი (მე ახალი ნიორი მქონდა და ის დავამატე 2 პატარა თავი) მოასხით ზეითუნის ზეთი, ძმარი, მარილი და პილპილი. კარგად ამოურიეთ და 5-10 წუთი დატოვეთ, გემო რომ კარგად გაუჯდეს. დიდიხანს ნუ დათოვებთ, თორემ კიტრი წვენს გაუშვებს.

ახლა ჩემს აზრს გაგიზიარებთ ვფიქრობ, გენიალური მეტისმეტად ხმამაღალი ნათქვამია ამ სალათისთვის. გემრიელი ნამდვილად არის მაგრამ, არა ისეთი,რომ ვერ დაივიწყო  თუმცა გემოვნება ხომ ძალიან ინდივიდუალურია…  იქნებ არც თქვენ მოგეწონოთ ის, რაც მე აღმაფრთოვანებს

როცა ნამდვილი, დროულად დამწიფებული ბაღის კიტრი შემოვა, კიდევ გავაკეთებ. აი ისეთი, რომ გაჭრი და არომატი აავსებს ოთახს

პ.ს. ადრეც მქონდა ასეთი ისტორია. ერთი ბლოგერის ქება დიდებისა და აღფრთოვანებული პოსტის შემდეგ გავაკეთე წიწიბურას “პეჩენიები”.  სპეციალურად შევიძინე წიწიბურას ფქვილი და დიდი მოლოდინით აღსავსე შევედი სამზარეულოში…  შედეგი იყო სრული საშინელება! მსგავსი უგემური მანამდე არაფერი მეჭამა მთლიანად ნაგავში გავუშვი.