კალათები ფილოს ცომით

კალათები ფილოს ცომით

 

ეს ძალიან მსუბუქი და გემრიელი ღვეზელებია, რომელიც მარტივად მზადდება და ფანტაზიის ჩართვის საშუალებასაც იძლევა. შეგვიძლია გულში სხვადასხვა ინგრედიენტი ჩავუდოთ.

ფილოს ცომი  თურქულ და ბერძნულ  სამზარეულოშია გავრცელებული. საქართველოში თურქულ მაღაზიებში იყიდება, მაგრამ თუ ვერ იშოვით ფენოვანითაც შეგიძლიათ შეცვალოთ

_DSC0015 (Copy)

  •  10 ფურცელი ფილო
  • 5 ფირფიტა ბეკონი
  • 10 ბროკოლის ყვავილედი
  • 200 გ არაჟანი ან 20% ნაღები
  • 2 კვერცხი
  • მარილი
  • პილპილი
  • გახეხილი ყველი
  • გამდნარი კარაქი, მარგარინი ან ზეთი ფილოს ფურცლებზე წასასმელად

 

ბროკოლის ყვავილედები 1-2 წუთით ჩავუშვათ მარილიან მდუღარე წყალში, გადავწუროთ და გადავავლოთ ცივი წყალი.

ბეკონის ფირფიტები გავჭრათ ორად.

არაჟანი და კვერცხები ერ)ტად ავთქვიფოთ, დავამატოთ მარილი და პილპილი.

ფილოს თითო ფურცელი გადავკეცოთ სამად, შემდეგ კიდევ სამად ისე რომ პატარა კვადრატი მივიღოთ. ფენებს შორის ფუნჯით ვუსვამთ ცხიმს, მაგრამ არ გავჟღინთოთ.

ჩავაფინოთ ტარტალეტკის ან მაფინის ფორმებში, ჩავუდოთ ბროკოლის ყვავილედი და ბეკონის ნაჭერი, დავასხათ სოუსი , მოვაყაროთ ყველი.

გამოვაცხოთ 200 გრადუსზე გახურებულ ღუმელში დაახლოებით 20 წუთი

_DSC0026 (Copy)

 პ.ს. გულსართი შეიძლება იყოს სხვადასხვა: ქათმის ფილე და სხვადასხვა ბოსტნეულის მიქსი – წითელი ბულგარული, ყვავილოვანი, სატაცური, მწვანე ბარდა(გაყინული, ნედლი) , ორაგული, სოკო და ა.შ.

 

 

 

Use Facebook to Comment on this Post

კარტოფილის სალათა

კარტოფილის სალათა

კარტოფილი ჩემი საყვარელი ბოსტნეულის სიაში საპატიო ადგილს იკავებს. შემწვარი კარტოფილი ხომ საერთოდ, უგემრიელესია, მაგრამ ამასთანავე აბსოლუტურად არა-სასარგებლო :(  ვცდილობ, იშვიათად მოვამზადო და მივირთვა.  ჩემს საყვარელ კარტოფილს უფრო სასარგებლო გამოყენებას ვუძებნი, ნაკლებად ცხიმიანს და ბევრად ჯანსაღს.

_DSC0038 copy

 

600 გ კარტოფილი

1 პატარა თავი  ბროკოლი

1-2 მოხარშული კვერცხი, სურვილით

6 ს.კ ზეით.ზეთი

½ ჩ.კ მდოგვი

2 ს.კ ტარხუნის ძმარი ( რეცეპტი ნახეთ ამ პოსტში)

მარილი

პილპილი

კამა, რეჰანი და ბაზილიკი

 

კარტოფილი დავჭრათ მსხვილად და მოვხარშოთ  (ან ჯერ მოვხარშოთ და მერე დავჭრათ. თბილი)

ბროკოლი 2 წუთით გამოვატაროთ მდუღარე მარილიან წყალში.

შევურიოთ ერთმანეთს, მოვაყაროთ მწვანილი, სურვილის შემთხვევაში კვერცხიც და თბილ-თბილსვე მოვასხათ სოუსი. თბილი ბოსტნეული უკეთ იწოვს სოუსის მთელ არომატს.

სოუსისთვის ერთმანეთში ავურიოთ ძმარი, ზეთი, მარილი, პილპილი და მდოგვი.

ზემოდან სილამაზისთვის პაპრიკა აყრია.

უნდა მივირთვათ ასევე თბილ-თბილი, გნებავთ ცალკე, გნებავთ გარნირად.

Use Facebook to Comment on this Post

ბოსტნეულის ღვეზელი

ბოსტნეულის ღვეზელი

 

ბოსტნეულის ღვეზელები გიყვართ? თუ კი, მაშინ კითხვა განაგრძეთ :) თუ არა, მაშინ მომწერეთ კომენტარებში და რაიმე გემრიელ რეცეპტს თქვენთვის აუცილებლად მოვძებნი :)

სიმართლე რომ გითხრათ ეს ფოტო კარგა ხნის წინ გადავიღე, მაგრამ მხოლოდ ახლა მოვახერხე გამოქვეყნება…   არდადეგებზე მივდიოდი და მაცივარში არსებული პროდუქტების უტილიზაცია მინდოდა, ეს ღვეზელი სწორედ ამის შედეგად შეიქმნა :)

თუ გადაწყვეტთ, რომ მოამზადოთ, მოიმარაგეთ:

 

gvezel

1 შეკვრა მზა  ფენოვანი ცომი

500 გ  ბოსტნეული: ყვავილოვანი კომბოსტო, ბროკოლი, სოკო

200 გ ნაღები 20%

2 კვერცხი

ყველი

მარილი

პილპილი

 

სოკო დავჭრათ და ტაფაზე ცოტა ცხიმში დავბრაწოთ. ბროკოლი და ყვავილოვანი კომბოსტო მოვწალოთ მარილწყალში რამდენიმე წუთით. გადავწუროთ და გავაგრილოთ.

 

თასში ავთქვიფოთ კვერცები. ცოტა გადავინახოთ, დანარჩენი კი ნაღებს შევურიოთ. დავამატოთ  მარილი, პილპილი. ცომი გავშალოთ ფორმაში და გავანაწილოთ მასზე ბოსტნეული.  მოვასხათ სოუსი და მოვაყაროთ გახეხილი ყველი. ზემოდან გადმოვაკეცოთ გვერდები.  ათქვეფილი კვერცხი გადავუსვათ და 180-200 გრადუსზე გამოვაცხოთ დაახლოებით 30-40 წთ, სანამ  დაიბრაწება.

Use Facebook to Comment on this Post

ბროკოლის სალათი იტალიურად

ბროკოლის სალათი იტალიურად

დაახლოებით 2 წლის წინ, ბლოგის ერთ-ერთმა მკითხველმა, ქეთი მაღლაკელიძემ ძალიან სასიამოვნო საჩუქარი გამიკეთა და იტალიელი შეფ-მზარეულის, ჯინო დ’აკამპოს წიგნი მაჩუქა. მისი ეს ჟესტი, ბუნებრივია, ძალიან სასიამოვნო იყო  ჩემთვის და დღემდე, როცა ამ წიგნს ვშლი, მადლიერების გრძნობა მავსებს :)  წიგნის გარდა უგემრიელესი ფორთოხლის მარმელადი და არომატული ჩაის ნაკრებიც გამომიგზავნა. კულინარიის სიყვარულმა, სხვადასხვა სოც.ქსელმა  და  ამ ბლოგმა უამრავ კარგ ადამიანთან ურთიერთობის საშუალება მომცა და ეს ძალიან მახარებს. ზოგჯერ ეს ურთიერთობები რეალურია, ზოგჯერ კი ვირტუალური, თუმცა ნამდვილი და წრფელი. მე ხომ  ქეთის პირადად არ ვიცნობ და საერთოდ, საქართველოშიც არ ცხოვრობს.

მოკლედ ასე: ეს სალათის ჯინოს ფანტასტიური წიგნიდანაა. ფანტასტიური ტყუილად არ მიხსენებია, სწორედ ასე ჰქვია Fantastico!

brok

400-500 ბროკოლი

½ წიტელი ჩილი ან თუ ცხარე არ გსურთ 1 წითელი ბულგარული

2 ს.კ მოხალული კედარის კაკალი(თუ არ გაქვთ, შეცვალეთ მოხალული ნიგვზით, ნუშით ან სხვა სასურველი თხილულით თუ თესლებით)

3 ს.კ ლიმონის წვენი

4 ს.კ ზეითუნის ზეთი

2/3 ჩ.კ მოტკბო მდოგვი (ანუ არა ცხარე)

პილპილი

მარილი

½ ჩ.კ შაქარი

 

ბროკოლი დავშალოთ ყვავილედებად  და მდუღარე მარილიან წყალში მოვწალოთ 2-იოდე წუთით.გადავწუროთ, დავამატოთ თხლად დაჭრილი წიწაკა.

მოვასხათ შემდეგი სოუსი: ზეთი, ლიმონის წვენი, მდოგვი, მარილი, პილპილი და შაქარი ჩანგლით ან კოვზით კარგად ავურიოთ სანამ ერთგვაროვან ემულსიას არ მივიღებთ.

ზემოდან მოვაყაროთ კედარის კაკალი და მივიტანოთ სუფრაზე თბილი.

სულ ეს არის :) გემრიელად მიირთვით…

Use Facebook to Comment on this Post

ქათამი ქოქოსის რძით

ქათამი ქოქოსის რძით

ქათამი ქოქოსის რძით ეგზოტიკური, გემრიელი და საინტერესო კერძია.   ნამდვილად ღირს, რომ ერთხელ მაინც სცადოთ და მოამზადოთ.  მე თავად  დონას რეცეპტის შთაგონებით მოვამზადე, თუმცა მცირე ცვლილებები შევიტანე ჩემს მაცივარში არსებული პროდუქტების გათვალისწინებით

qatami qoqosis rzit

 

ქათმის ფილე 2 ცალი (ანუ მთლიანი მკერდი, ძვლების და კანის გარეშე)

ბროკოლისა და  ყვავილოვანი კომბოსტოს  4-5 პატარა ყვავილედი (თითოეული)

100 მლ ქოქოსის რძე

1-2 ცალი პამიდორი

1 თავი ხახვი

1 ჩ.კ. კარის სუნელი

წითელი წიწაკა, პაპრიკა,მარილი გემოვნებით

ნედლი ქინძი ან ოხრახუში მოსაყრელად

 

პამიდორს მოვაცილოთ კანი და წვრილად დავკეპოთ ან პიურედ ვაქციოთ.

ზეთში მსუბუქად მოვშუშოთ ხახვი.

დავამატოთ დაჭრილი ქათმის ფილე და მოვბრაწოთ

შემდეგ მოვაყაროთ სუნელები: კარი, პაპარიკა, წიწაკა და მოვასხათ პამიდვრის პიურე. ვადუღოთ რამოდენიმე წუთით

დავამატოთ ქოქოსის რძე, ბროკოლი,  ყვავილოვანი კომბოსტო და კვლავ დავტოვოთ ცეცხლზე  5-6 წუთი.

გადმოვიღოთ ცეცხლიდან და დავამატოთ დაჭრილი მწვანილი და მარილი.

 

Use Facebook to Comment on this Post

ბრინჯი ბოსტნეულით და კვერცხით-2

ბრინჯი ბოსტნეულით და კვერცხით-2

ბრინჯი ბოსტნეულითა და კვერცხით ძალიან მარტივი და გემრიელი კერძია.  მისი მირთმევა შეიძლება როგორც დამოუკიდებლად,ასევე გარნირად ქათმისა და ხორცის კერძებთან. ერთი  მსგავსი კერძი უკვე გვაქვს ბლოგზე, შეიძლება ითქვას თითქმის იგივეა, მცირე ცვლილებებით. მაგრამ მაინც დავწერ :)

 brinji

300 გ ბრინჯი ბასმატი

250-300 გ ყვავილოვანი კომბოსტო

200 გ ბროკოლი

2 სტაფილო

1 ხახვი

1  წითელი ბულგარული წიწაკა

1დიდი კვერცხი

 

 

ბრინჯი მოვხარშოთ ორმაგი რაოდენობის წყალში, ჩვეულებისამებრ.

 

პარალელურად, მოვამზადოთ ბოსტნეული: წვრილად დავჭრათ ხახვი და სტაფილო, მოვშუშოთ თავსახურის გარეშე, ტაფაში, სწრაფ ცეცხლზე. სანამ იშუშება,წვრილად დავჭრათ ყვავილოვანი და ბროკოლი. ტაფაში ჯერ მათი წვრილად დაჭრილი ძირები ჩავაყაროთ, რადგან უფრო მაგარია, ვიდრე ყვავილედი. ორიოდე წუთში ჩავამატოთ დაჭრილი ყვავილედები და ბულგარული წიწაკა.  ბოსტნეული ძალიან არ უნდა დარბილდეს, მხოლოდ მსუბუქად მოიბრაწოს. ამიტომ  ეს პროცესი გრძელდება 5-7 წუთი, მაღალ ცეცხლზე.

ბოლოს, ამ ბოსტნეულს ვამატებთ მოხარშულ ბრინჯს. კარგად ავურიოთ და მოვასხათ გათქვეფილი კვერცხი. სწრაფად ვურიოთ რომ კვერცხი შეიკრას და კარგად გადანაწილდეს.

ბოლოს ვამატებთ მარილს გემოვნებით და პილპილს სურვილის შემთხვევაში.

მე პირადად ცალკეც მშვენივრად მივირთმევ, თუმცა გარნირადაც არაჩვეულებრივია, დაბრაწულ ქათამთან ან რაიმე ხორცეულთან.

 

Use Facebook to Comment on this Post

ქათმის ხორცი ბოსტნეულით

ქათმის ხორცი ბოსტნეულით

როცა სამსახურში კაფეტერია შვებულებაში გადის, წესით, ისღა დამრჩენია, თავად მოვიმზადო მეორე დღისთვის საუზმეც, სადილიც და ხანდახან ვახშამიც :D თუმცა, რამდენად ვახერხებ ამას – ეს უკვე ცალკე საკითხია.

ამიტომ, ჩემი სამსახურის მენიუ ძირითადად რძის პროდუქტებითა და ხილით შემოიფარგლება, მაგრამ ხორცისადმი ჩემი ნეიტრალური დამოკიდებულების მიუხედავად, ხანდახან ესეც საჭიროა. ამიტომ, რამდენიმე დღის წინ, მაცივარში შემორჩენილი ცოტა ბოსტნეულისა და ქათმის ხორცით სახელდახელო კერძი მოვიმზადე (სახელდახელო მხოლოდ იმიტომ, რომ ქათმის შეწვაზე ჩემს მისვლამდე დედამ იზრუნა).

ინგრედიენტები 1 პორციისათვის:

  • 1 ნაჭერი ქათმის ხორცი (შემწვარი, ან მოხარშული)
  • 1 ცალი პატარა წითელი პაპრიკა (ბულგარული წიწაკა)
  • 1 ტოტი ბროკოლი
  • 1 პატარა პომიდორი
  • 3-4 ცალი სოკო
  • 1 ცალი ხახვი
  • მარილი, ხმელი ორეგანო (1/2 ჩაის კოვზი)
  • ცოტა ზეთი მოსაშუშად
  • წითელი წიწაკა (გემოვნებით)

მომზადება:

დიდ ნაჭრებად დაჭერით ხახვი, სოკო, წიწაკა და ბროკოლი. დააწყვეთ ცხელ, ზეთიან ტაფაზე და თავდახურულში შუშეთ ცოტა ხანს, საშუალო ცეცხლზე. შემდეგ დაუმატეთ ქათმის პატარა ნაჭრები (უმჯობესია დაჭრის ნაცვლად ხელით დაანაწევროთ, სიგრძივად), სულ ბოლოს კი კანგაცლილი, დაჭრილი პომიდორი, მარილი და ორეგანო. რამდენიმე წუთიც აცალეთ და გადმოდგით ცეცხლიდან.

შეგიძლიათ მიირთვათ როგორც ცხლად, ისე – ცივად. მნიშვნელოვანია, რომ ყველა ბოსტნეული იყოს ნახევრადმოშუშული, ასე უფრო ჯანმრთელია და სასარგებლო. ჩემი აზრით – გემრიელიც.

შენიშვნა: ბოსტნეულს შეგიძლიათ დაუმატოთ წვრილ, გრძელ ნაჭრებად დაჭრილი სტაფილოც. ამ შემთხვევაში, ორეგანოს ნაცვლად შეგიძლიათ ქარის ინდური სანელებელი (curry) გამოიყენოთ. ქათმის ხორცსაც უხდება და სტაფილოსაც :)

Use Facebook to Comment on this Post