როგორ შევღებოთ კვერცხები ენდროთი

როგორ შევღებოთ კვერცხები ენდროთი

ეს რეცეპტი, ალბათ, არავისთვის იქნება სიახლე, მაგრამ კულინარიულ ბლოგზე ასეთი მარტივი ჭეშმარიტება ხომ უნდა იყოს?  ამიტომ  მაინც დავწერ.

ჯერ რამდენიმე რჩევით დავიწყებ:

  • შეეცადეთ შესაღებად კვერცხები რამდენიმე დღით ადრე შეიძინოთ. ახალი კვერცხი კარგ მუქ ფერზე არ იღებება.
  • მოძებნეთ შედარებით ძველი ქვაბი, რომლის ენდროთი გაფუჭებაც არ დაგენანებათ. ან ისეთი ქვაბი, მავთულით რომ გაიხეხოს მოგვიანებით.
  • ხახვის ფურცლები აუცილებელი არ არის, მხოლოდ ენდროც მშვენივრად უმკლავდება საქმეს. მაგრამ თუ ცოტა გაქვთ, შეგიძლიათ ხახვიც დაამატოთ

ენდროს ფესვები გარეცხეთ, რომ ზედმეტი მიწა მოსცილდეს. ჩადეთ ერთ ფენად პარკში და ხორცის საბეგვი ჩაქუჩით დაჩეჩქვეთ. ძალიანაც ნუ გადაჰყვებით, საკმარისია კანი გაიჩეჩქვოს და ფესვი დაზიანდეს.

endro

ჩადეთ ქვაბში, დაასხით წყალი და წამოადუღეთ დაახლოებით 10-15 წუთი. გააგრილეთ. უმჯობესია აივანზე, რადგან უსიამოვნო სუნი აქვს.

fg

შემდეგ ჩაალაგეთ კვერცხები. ჩაყარეთ ცოტა მარილი (ასე კვერცხებუ უკეთ გაიფცქვნება). მე ძმარს არ ვასხამ, თუმცა თქვენ შეგიძლიათ. დადგით ცეცხლზე და წამოადუღეთ. ხარშეთ დაახლოებით 15 წუთი. შეამოწმეთ: თუ კარგი ფერი აქვს კვერცხებს, საკმარისია დუღილი. კვერცხები გადაიტანეთ ცივ წყალში. იგივე ნახარშში შეგიძიათ მეორეჯერაც შეღებოთ კვერცხები, მაგრამ მანამდე კიდევ გააციეთ, თორემ კვერცხები დასკდება.

endro1

მე 2 კონა ენდრო თავისუფლად მეყო 40 კვერცხის შესაღებად და როგორც ხედავთ, საკმაოდ ინტენსიური ფერიც მივიღე :)

citeli kvercxi

 თუ გსურთ შეღებვისას კვერცხს ნახატები დაატანოთ, იხილეთ ეს პოსტი

Use Facebook to Comment on this Post

სააღდგომო პასკა ან გნებავთ – კულიჩი

სააღდგომო პასკა ან გნებავთ – კულიჩი

სააღდგომო პასკას წლებია სახლში ვაცხობ თქვენთვის უკვე კარგად ნაცნობი ამ რეცეპტით. რეცეპტი, უფრო სწორად კი მიღებული შედეგი ძალიან მომწონს და რაიმე განსხვავებულის ძებნით თავი აღარ დამიღლია. ერთი ეგაა, რომ რეცეპტი ბევრად გავამარტივე. გამარტივება იმაში გამოიხატება, რომ ინგრედიენტებს ცალ-ცალკე არ ვამზადებ და ყველაფერს ერთიანად ვზელ.    ამგვარად, ბევრი გაზომვა – აწონვისა და არითმეტიკის გარეშე, საღამოს ცომის ზელვას შევუდექი, დილით გადავზილე და ფორმებში გადავიტანე.  კარგად ავაფუვე და ცხოვრებაში ყველაზე კარგი პასკა გამომივიდა! პასკის თავები იყო იდეალურად ერთგვაროვანი, ყოველგვარი ნაპრალების და ნახეთქების გარეშე.

pska

აქამდე წაკითხულ ყველა რეცეპტსა და რჩევაში ნათქვამი იყო, რომ პასკის ცომის დიდხანს ზელვა აუცილებელი პირობაა კარგი შედეგის მისაღებად.  დიდხანს ზელვა ცომს ელასტიურობას მატებს და თავები აღარ უსკდებათ. მაგრამ, უნდა გამოგიტყდეთ, სულაც არ ვზილე დიდხანს, პირიქით, ცომი ხელზე მეკრობოდა, როცა ზელვას მოვრჩი და ასაფუებლად სითბოში დავდგი.

მოდით, გადავალ უშუალოდ რეცეპტზე. როგორც უკვე აღვნიშნე, გამოვიყენე იგივე ინგრედიენტები, რაც ჩემს ძველ რეცეპტში მქონდა მითითებული, მაგრამ ზუსტი პროპორციების გარეშე.

  • 250 გ რძე
  • 60 გ კარაქი
  • 200 გ შაქარი
  • 2 ჩ.კ მშრალი საფუარი
  • 3 მსხვილი კვერცხი
  • 4 სავსე ჩ.კ არაჟანი
  • 700-750 გ ფქვილი
  • 1 პაკეტი ვანილი
  • 2/3 ჩ.კ დარიჩინი, ამდენივე დაფქული ჯანჯაფილი
  • 1/3 ჩ.კ დაფქული მიხაკი
  • 2/3 ჩ.კ დაფქული კარდამონი
  • 1/2 ჩ.კ მუსკატი
  • 1 ჭიქა ქიშმიში
  • 1 ლიმონის ცედრა

 

პირველ რიგში, აღვნიშნავ, რომ სანელებლების და არომატების რაოდენობა თქვენი სურვილით შეგიძლიათ გაზარდოთ ან შეამციროთ, იმის მიხედვით როგორი პასკა ან რომელი სუნელი გიყვართ.

ახლა კი გადავალ ცომის მომზადების გამარტივებულ მეთოდზე. ცომის მომზადებას ვიწყებთ ღამით, დაახლოებით 11 საათისკენ. რძეს გავაცხელებთ და ჩავადნობთ კარაქს.  შევურევთ საფუარს ( ამ დროს რძე თბილი უნდა იყოს, თითს არ კბენდეს) . ვაცლით 10 წუთი და ვამატებთ  კვერცხს, არაჟანს, შაქარს, სუნელებს, ცედრას, ვანილს.

მოზრდილ ჯამში გავცრით ფქვილს და დავამატებთ სითხეს და დავიწყებთ ზელვას. როგორც უკვე გითხარით, ბევრი ზელვით თავი არ დამიღლია. ცომი ჯერ ისევ ხელებზე მეკრობოდა,  ლამაზად მოვაგუნდავე, თავზე ფქვილი მოვაყარე, ზემოდან ცელოფანი გადავაკარი და  პლედში შევფუთე.

დილით ცომი გაორმაგებულიც იყო და მეტიც. გარეცხილ – გამშრალი ქიშმიში და ჩემივე გაკეთებული ფორთოხლის ცუკატები დავამატე. ზეთიანი ხელებით ჩავზილე და ფორმებში გადავიტანე.

სპეციალური ფორმები არ მაქვს. მქონდა საშუალო ზომის 1 ალუმინის ქვაბი, 1 ემალის, უფრო მომცრო  და 1 კონსერვის ქილა. ემალს გვერდებზეც ჩავუფინე ქაღალდი, დანარჩენ ორს მხოლოდ ძირზე, გვერდებზე კი ცხიმი წავუსვი.

ფორმებში ცომი უფრო ნაკლები იყო, ვიდრე 2/3. თავზე გადავაფარე და იმავე პლედში შევფუთე. დაახლოებით 4-5 საათში, შუადღისთვის ცომი ამოფუებული იყო. ეს ეტაპი აუცილებელია – ცომს ხელახლა გაორმაგება უნდა აცალოთ. გამოვაცხე 170 გრადუსზე , სანამ თავები ლამაზ ოქროსფრად არ მოებრაწათ.

რადგან ზემოდან თეთრი შაქრიანი მინანქრის წასმას ვუპირებდი, თავზე კვერცხის გული არ გადამისვია.

paska1

ბარემ მინანქარზეც დავწერ, სანამ მკითხავთ :)

ძალიან მარტივად მზადდება, 1 კვერცხის ცილა და 1 ჭიქა შაქრის პუდრი დაგჭირდებათ.

კვერცხი მიქსერით მსუბუქად ავთქვიფოთ, უბრალოდ რომ თეთრად აქაფდეს. დავამატოთ გაცრილი პუდრა და გავაგრძელოთ თქვეფა. მინანქარი უფრო შესქელდება და გათეთრდება.  თუ თხელი გეჩვენებათ, პუდრა დაამატეთ. თუმცა ძალიან სქელი არ უნდა იყოს.

paska2

მინანქრის წასმის შემდეგ პასკები ჰაერზე უნდა დავტოვოთ გასაშრობად. კარგად რომ გაშრება, შემდეგ ჩვეულებრივად შეინახავთ პარკით ან ქვაბში.

მრავალ აღდგომას დაესწარით!

pask1

 

Use Facebook to Comment on this Post

სააღდგომო ჩიტის ბუდე

სააღდგომო ჩიტის ბუდე

ვფიქრობ, სახალისო იდეა :)   ჩემს შვილებს ძალიან მოეწონათ მზადებისა და დაგემოვნების პროცესიც,  განსაკუთრებით ბუდეებიდან კვერცხების მოპარვა ;)

 citis bude

ტარტალეტკის ცომისთვის:

150 გ კარაქი /მარგარინი

3 კვერცხის გული

50 გ შაქარი

280-300 გ ფქვილი

2 ჩ.კ კაკაო

მწიკვი მარილი

 

კრემი: 3 კვერცხის ცილა, 120-150 გ შაქარი

 

ფორთოხლის, შინდის ან ჟოლოს ან სხვა სასურველი ჯემი

შოკოლადის მინი კვერცხები, თითოეული  ტარტალეტკისთვის  2-3 ცალი, ზომის მიხედვით

 

ფქვილი , მარილი, შაქარი და კაკაო ავურიოთ ერთმანეთში. თუ თეთრი ტარტალეტკები გვინდა, კაკაოს ნუ დავამატებთ.

დავამატოთ დარბილებული კარაქი და ხელით კარგად ავსრისოთ. ბოლოს შევურიოთ კვერცხის გულები.

შეგვიძლია ეს ყველაფერი ფუდ პროცესორში ან ბლენდერში გავაკეთოთ, ოღონდ ამ შემთხვევაში კარაქი ცივი უნდა იყოს.

გავანაწილოთ ფორმებში და ჩანგლით დავჩხვლიტოთ. მაცივარში გავაციოთ დაახლოებით 20-30 წუთი და გამოვაცხოთ 170-180 გრადუსზე.

 

კრემი: ბეზეს დავამატოთ ცოტა მარილი, ჭურჭელი დავდგათ   ორთქლის აბაზანაზე და დავიწყოთ თქვეფა. (ცეცხლი უნდა იყოს დაბალი, რათა წყალი უნდა იყოს დუღილის ზღვარზე) როცა  ცილა ღრუბლის კონსისტენციას მიიღებს, ვიწყებთ შაქრის დამატებას ნაწილ-ნაწილ, 3 ეტაპად , თქვეფის შეუჩერებლად. საბოლოოდ უნდა მივიღოთ მყარი, მდგრადი, პრიალა მასა.

გაცივებულ ცომის კალათებში გავანაწილოთ თითო ჩაის კოვზი ჯემი, ბეზე გადავიტანოთ საკონდიტრო ტომარაში,  სასურველი ფიგურული პირით. ჯემის ზემოდან დავადოთ ბეზეს თხელი ფენა, შემდეგ კი გარშემო ბუდესავით ავუმაღლოთ ნაპირები. ამ ბუდეში ჩავალაგოთ 2-3 კვერცხი

 

Use Facebook to Comment on this Post

სააღდგომო ღვეზელი

სააღდგომო ღვეზელი

აი ასეთი ფერადი და ლამაზი ღვეზელი მოვამზადე წინასააღდგომოდ.  რეცეპტი ჩემი საყვარელი ფრანგული კულინარიული ჟურნალიდან ავიღე. რეცეპტში არაფერი შემიცვლია, გარდა ყველის სახეობისა, გულში კი სოფლის კვერცხები ჩავულაგე, უფრო მკვეთრი და ხასხასა გული აქვს, ამიტომ მომწონს :)  ვფიქრობ არაჩვეულებრივია და სხვა დროსაც გამოვაცხობ, არა მხოლოდ აღდგომას .

saaggomo

 

3 კვერცხი

150 გ ფქვილი+1 პაკეტი გამაფხვიერებელი (ან 2/3 ჩ.კ. სოდა)

130 გ რძე

100 გ გახეხილი ყველი (სასურველია ნაკლებადმარილიანი სულგუნი ან ევროპული ტიპის ყველი)

80 მლ მზესუმზირის ზეთი

მარილი, პილპილი

  • ამას გარდა:

200 გ ისპანახის ფოთლები

200 გ ხბოს ან საქონლის ფარში

4 მოხარშული კვერცხი

 

მოვამზადოთ ცომი: შევურიოთ კვერცხი და რძე, დავამატოთ ზეთი, შემდეგ კი ფქვილი და გამაფხვიერებელი. ბოლოს ვამატებთ გახეხილ ყველს, მარილსა და პილპილს.

ისპანახის ფოთლები ოდნავ  მოვწალოთ ცხელ მშრალ ტაფაზე (შეგვიძლია 2-იოდე კოვზი ზეთიც დავამატოთ). ჩავამატოთ ცომში ხორცის ფარშთან ერთად და კარგად ავურიოთ.

კექსის გრძელ ფორმაში ჩავაფინოთ საცხობი ქაღალდი და ჩავასხათ ცომის ნახევარი. შევდგათ 10-15 წუთით 180 გრადუსზე გახურებულ ღუმელში. ამ დროის გასვლის შემდეგ გამოვიღოთ, დავალაგოთ მოხარშული კვერცხები სიგრძეზე და დავასხათ დარჩენილი ცომი და შევაბრუნოთ ღუმელში.

ცხვება დაახლოებით 40-45 წუთი. მივირთვათ თბილი ან ოთახის ტემპერატურაზე გაგრილებული მწვანე სალათთან ერთად.

 Без имени-1111

Use Facebook to Comment on this Post

შოკოლადიანი ხაჭოს პასკა

შოკოლადიანი ხაჭოს პასკა

ხაჭოს პასკა წელს პირველად გავაკეთე და უკვე გადავწყვიტე რომ ჩემი სააღდგომო მენიუს განუყრელი ნაწილი გახდება, რა თქმა უნდა , სხვადასხვა ვარიაციებით და არომატებით.  გუშინ შუადღით, სახლისკენ მომავალმა 600 გრამი ხაჭო ვიყიდე და სავარაუდო რეცეპტის შემუშავებას შევუდექი. ვანილიანი თუ შოკოლადიანი?  ფერადი ცუკატებით თუ ფორთოხლით? ამ ფორმაში თუ იმ ფორმაში? ამ ფიქრებში  ხაჭო საწურზე გადავიტანე და დილისთვის დავგეგმე მომზადება. მაგრამ აღდგომამდე ისე ცოტა დარჩა,მე კი მინდოდა თქვენთვისაც გამეზიარებინა რეცეპტი, ამიტომ გუშინ ღამის 11 საათზე შევუდექი საქმეს. 30 წუთში ყველაფერი მზად იყო, მთელი ღამით მივაბრძანე მაცივარში და დილით ეს საოცრება დავაგემოვნე კიდეც :)

xaco-sokoladis paska

600 გ ხაჭო (მე მქონდა 9 %)

250 მლ ნაღები 35%

100 გ შავი შოკოლადი, მინიმუმ 65% კაკაოს შემცველობით

3 კვერცხის გული

150 გ შაქარი + 30 მლ წყალი

3 ჩ.კ. კაკაო, თავმობმული

მწიკვი მარილი

2 ჩ.კ. ფორთოხლის ცედრა, სავსე

ვანილი

შტოშის ჩირი, 1 მუჭა (შეგიძლიათ სხვა ჩირით შეცვალოთ, მე ეს მქონდა)

 

ხაჭოს დავდოთ საწურზე და დავადოთ რაიმე სიმძიმე, რომ ზედმეტი სითხისგან დაიწუროს.

ცოტა ნაღები გავაცხელოთ და ჩავყაროთ დატეხილი შოკოლადი,  ვურიოთ რომ კარგად გაიხსნას და ერთგავროვანი მასა გახდეს. გავაგრილოთ მთლიანად.

კვერცხის გულები მოვათავსოთ თასში და მსუბუქად ავთქვიფოთ მიქსერით

ხაჭო აუცილებლად საწურში უნდა გავატაროთ.  ცოტ- ცოტას ჩავყრით და კოვზის დახმარებით გავსრესთ. ასე ხაჭო უფრო ერთგვაროვანი და ფუმფულა იქნება.

სანამ ხაჭოს ”ვცრით” , ცეცხლზე სიროფი მოვამზადოთ: შაქარი და წყალი დაბალ ცეცხლზე დავდგათ და ვადუღოთ. დაახლოებით 5 წუთში ხაჭოც მზადაა და სიროფიც.

ათქვეფილ კვერცხის გულებს წვრილ ზოლად ვასხამთ მდუღარე სიროფს და თან ვთქვეფთ.  მასა ნელ-ნელა უფრო ფუმფულა, მუსის კონსისტენციის გახდება და მკრთალ მოყვითალო ფერს მიიღებს. საერთოდ კვერცებს უმად ამატებენ ხოლმე, მაგრამ რადგან ეს გემრიელი დესერტი ბავშვებისთვისაც უნდა მეჭმია, ეს პასტერიზებული ვარიანტი  ვამჯობინე .

კვერცხის გულები დავასხათ ხაჭოს, დავამატოთ მარილი, ფორთოხლის ცედრა, ვანილი და კარგად ავთქვიფოთ. (ამ ეტაპზევე უნდა დამემატებინა ათქვეფილი კარაქი, რომელიც მე დამავიწყდა :D რადგან მის გარეშეც არაჩვეულებრივი იყო, თან უფრო მსუბუქიც, რეცეპტშიც აღარ მივუთითე, თუმცა თუ გნებავთ დაამატეთ, დაახლოებით 50-80 გრამი)

ავთქვიფოთ კარგად გაციებული ნაღები კრემის კონსისტენციამდე, ბოლოს შევურიოთ გაგრილებული გამდნარი შოკოლადი და დავაცრათ კაკაო.  მიღებული შოკოლადიანი კრემი შევურიოთ ხაჭოს მასას.  დავამატოთ ჩირებიც. თუ ჩირი დიდია დავჭრათ

სურვილის შემთხვევაში ცოტა ფორთოხლის ლიქიორიც შეგვიძლია დავამატოთ :)

ფორმაში ვაფენთ მარლის 2-3 ფენას და ვდებთ ხაჭოს. მთელი ღამით ვდებთ მაცივარში, დილით კი თეფშზე გადმოვაბრუნოთ და მარლა ფრთხილად შემოვაცალოთ.

xachos paska shoko

დეკორისთვის გამოიყენეთ რაც გნებავთ, ფოტოზე თეთრი და შავი შოკოლადის ფანტელები, წვრილად დაჭრილი ჩირი და ფორთოხლის კანებია. შეგვიძლია კაკაო მოვაყაროთ ან ნაღებთან ერთად გამდნარი შოკოლადის გლაზური მოვასხათ

 

პ.ს. რჩევა: ნუ გამოიყენებთ 0 %-იან ხაჭოს, რაც უფრო ცხიმიანს აირჩევთ, მით უკეთესი :)

Use Facebook to Comment on this Post

სააღდგომო კვერცხის შეღებვა “ჩულქში”

სააღდგომო კვერცხის შეღებვა “ჩულქში”

სააღდგომო კვერცხის შეღებვა მგონი ერთ-ერთი ყველაზე ადვილი და სასიამოვნო რიტუალია. სხადასხვა ქვეყანაში კვერცხის შეღებვის სხვადასხვაგვარი ტრადიციაა, ზოგან უბრალოდ წითლად, ზოგან ნაირფრად, ზოგან კი სულაც დეკორატიული მოხატულობებით ღებავენ.
მე ყველაზე მეტად მუქი წითელი, მამაპაპურად, ენდროში შეღებილი კვერცხი მიყვარს, ბავშვობას მახსენებს, თან უფრო დრამატული და სიმბოლურია, ვიდრე ჭრელა-ჭრულა.
ბავშვობიდან კიდევ ერთი მეთოდი გამახსენდა – კვერცხის შეღებვა “ჩულქებში”
მაშ ასე, რა გვჭირდება:

  • კვერცხი (რაოდენობა სურვილის მიხედვით)
  • ქალის ჩულქები, გეტრები, კოლგოტი (რასაკვირველია, ახალი;))
  • მწვანილი – ოხრახუში, კამა, ქინძი, ნიახური (სულერთია)
  • ენდროთი სავსე ქვაბი – თავისთავად

პირველ რიგში, სველ კვერცხზე ვადებთ მწვანილის ლამაზ ფოთოლს მჭიდროდ და ვდებთ ჩულქში, კარგად გადავაკრავთ და ვკვანძავთ, რომ შემდეგი კვერცხი ჩავდოთ. ასე მანამ, სანამ არ გაივსება ჩულქი ან გამოილევა კვერცხი :D

kvercxis-shegebva4

შემდეგ გამოკრულ კვერცხებს ვაწყობთ ცივ/გრილ ენდროიან წყალში და ვდგამთ მაღალ ცეცხლზე, ცოტა ხანში ცეცხლს ვუკლებთ, რომ კვერცხი დიდხანს, გამუქებამდე იხარშოს, მაგრამ არ დასკდეს:
kvercxis-shegebva3

დაახლოებით 20 წუთში, კვერცხი უკვე მოხარშული და შეღებილი უნდა იყოს. ვამოწმებთ ფერს, თუ მზადაა – გადმოგვაქვს თასში და ვავლებთ ცივ წყალს:

kvercxis-shegebva2

გაგრილებულ კვერცხს ფრთხილად ვაცლით (ვაჭრით) შემოხვეულ ჩულქს და მწვანილს, ვავლებთ წყალს, ვამშრალებთ რბილი ქსოვილით და ვაპრიალებთ ზეთით:

kvercxis-shegebva1

პ.ს. გაითვალისწინეთ, რომ შეფუთული კვერცხი ცოტა უფრო ძნელად და ღია ფრად შეიღებება, ვიდრე შეუფუთავი. ასევე, კვერცხს შეიძლება ოდნავ დაეტყოს ჩულქის გადაკვანძვის ადგილები (მზისებურად დაიხატოს), მაგრამ ესეც უხდება. და კიდევ, ეცადეთ შეარჩიოთ მწვანილის სქელი ფოთლები, რომ ნაკლებად გაატაროს საღებავი.

Use Facebook to Comment on this Post

სააღდგომო პასკა (კულიჩი)

სააღდგომო პასკა (კულიჩი)

პასკის სახლში ცხობა რამდენიმე წელია რაც დავიწყე.  ამის სურვილი კი ჩემმა დედამთილმა გამიჩინა :)  მართალია, ის ჩემსავით არაა შეყვარებული კულინარიაზე, მაგრამ პასკას ყოველთვის სახლში აცხობდა.  ერთი ძველი რუსულენოვანი კულინარიული წიგნი აქვს, უამრავი საინტერესო რეცეპტით და სწორედ ამ წიგნის მიხედვით აცხობდა უგემრიელეს პასკას. მოგვიანებით,  ერთ-ერთ კულინარიულ ფორუმზე კიდევ ერთი კარგი რეცეპტი ვიპოვე, ამ ორის გაერთიანებით კი საბოლოო ვერსია შევაჯერე, რომელიც ძალიან მომწონს და ყოველ წელს ვაცხობ, ისე რომ ექსპერიმენტების სურვილი აღარ მიჩნდება.  არაჟანი რეცეპტში სწორედ  იმ ძველი რუსული წიგნიდანაა, ის ცომს სინოტივეს აძლევს/უნარჩუნებს და საბოლოო მზა პასკა არის სურნელოვანი, მძიმე, ნოტიო.

სანელებლებს ყოველთვის დიდი ყურადღებით ვეკიდები, აუცილებლად ახალდაფქული და არომატული უნდა იყოს. ახალდაფქულ კარდამონს  საოცარი სურნელი აქვს, თავბრუდამხვევი :) შეგიძლიათ სუნელებს წიანსწარ დაასხათ ცოტა სპირტი ან კონიაკი, ასე ბევრი აკეთებს.

ცომს თუ მაცივარში ააფუებთ უკეთესი იქნება, მაგრამ მთლიან ულუფას თუ გამოაცხობთ საკმაოდ ბევრია და არა მგონია მაცივარში დაეტიოს. აქვე გაითვალისწინეთ, რომ მაცივარში აფუება საკმაოდ ხანგრძლივი პროცესია.  მეორე ჩაზელვის შემდეგ ფორმებში გადაიტანთ და დააცლით ხელახლა ამოფუებას.  ძალიან ნუ დაბრაწავთ ღუმელში, რადგან გამოშრება, სასიამოვნო ოქროსფერი რომ გახდება გამოიღეთ.

 

  • 15 ც კვერცხი
  • 1,5 -2 კგ შაქარი
  • 500გრ კარაქი (ან მარგარინი, ან 50/50)
  • 500 გრ არაჟანი
  • 3,5 კგ ფქვილი (დაახლოებით, შესაძლებელია -/+)
  • 1ჩ.კ. ვანილი
  • 1 ჩ.კ. მუსკატი
  • 1/2 ჩ.კ მიხაკი (დაფქული ან დაჩეჩქვილი წვრილად)
  • 1ჩ.კ. დარიჩინი
  • 2ჩ.კ. ილი ანუ კარდამონი
  • 2კანიანად გატარებული ლიმონი
  • 500გრ ქიშმიში
  • ფორთოხლის ცუკატები(სასურველია)
  • ცალკე აიღეთ
  • 5-6 ს.კ საფუარი
  • 1 ლ თბილი რძე
  • 1ს.კ. შაქარი
  • მარილი
  • ცოტა ფქვილი საერთო რაოდენობიდან

მომზადება

სანელებლების რაოდენობა შეგიძლიათ გაზარდოთ, აქ მოცემულია აუცილებელი მინიმუმი
ქიშმიში დაალბეთ კონიაკში.
თბილი რძის ნახევარში  გახსენით საფუარი, შაქარი, ცოტა მარილი, ცოტა ფქვილი. აცალეთ აფუება.

გათქვიფეთ შაქარი და კვერცხები, შეურიეთ არაჟანი და საფუარიანი მასა.

შემდეგ იწყებთ ამ მასით ცომის ზელას: ამატებთ სანელებლებს ლიმონის ჩათვლით, კარგად გახსნით(სუნელების რაოდენობა შეგიძლიათ შეცვალოთ). ფქვილის შუაგულში ამოაღრმავეთ და ჩაასხით ჯერ საფუვრიანი მასა, დაიწყეთ ზელვა და ნელნელა ამატეთ კვერცხიანი მასა და დარჩენილი რძე. როგორც კი სასურველი სისიქის ცომს მიიღებთ, შეწყვიტეთ სითხის დამატება, სჯობს რძე ან კვერცხი მოაკლოთ, ვიდრე მეტი ფქვილი შეურიოთ, ეს ცომს დაამძიმებს. (ეს ცვლილება იმიტომ შემომაქვს რეცეპტში რომ სხვადასხვა ფქვილი ერთმანეთისგან განსხვავდება და ზუსტი რაოდენობა ვერ განვსაზღვრეთ ვერც მე და ვერც მკითხველებმა, რომლებმაც მოამზადეს) ცომი უნდა იყოს პურის ცომზე უფრო ნაზი, მაგრამ არა თხევადი.
(ზელისას ხელები ისველეთ ზეთში).

მოზელილი ცომი შეფუთეთ და აცალეთ აფუება, შემდეგ უკან ჩაზილეთ, თან შეაზილეთ გამდნარი კარაქი. კარაქი არ უნდა იყოს ცხელი, არამედ გამდნარი და გაგრილებული. ან გადნობის ნაცვლად ძალიან დარბილებული ოთახის ტემპერატურაზე. ეს უკანასკნელიც მიცდია და ძალიან კარგად ერევა ცომს.

თუ დრო გაქვთ, მეორე ამოფუების შემდეგაც ჩაზილეთ, თუ არა და ცომს შეურიეთ ქიშმიში და დაჭრილი ცუკატები, გაანაწილეთ საცხობ ფორმებში 1/3-ზე  ან ნახევრამდე და აცალეთ ხელახალი ამოფუება

გამოაცვხეთ 180 გრადუსზე, შეწითლებამდე. შემდეგ გასინჯეთ ჩხირით, თუ შიგნით მშრალია, გამოიღეთ, თუ არა და დაბალ ტემპერატურაზე ცოტა ხანი კიდევ დატოვეთ.

გაითვალისწინეთ: ცომს სჭირდება კარგი მოზელა, უნდა მივიღოთ ელასტიური და ნაჩვრეტებიანი სტრუქტურა. კარგი მოზელილი ცომი უნდა იყოს ცოტა წებოვანი, მაგრამ ხელს ადვილად უნდა სცილდებოდეს.

დამატებითი ინფორმაცია
ფორმაში ძირზე ჩააფინეთ ქაღალდი, თავად ფორმაც კარგად გაცხიმეთ. კულიჩი გამოდის სურნელოვანი, ოდნავ სველი ეფექტით (არაჟნის დამსახურებით) და ძალიან გემრიელი. ინგრედიენტების ეს რაოდენობა საკმარისია დაახლოებით 8-10 საშუალო ზომის კულიჩისთვის. შესაძლებელია გაანახევროთ და ისე გააკეთოთ

რეცეპტში რამდენიმე ცვლილება შემაქვს: რადგან ყველა ფქვილი განსხვავდება ერთმანეთისგან, რამდენიმე მკითხველმა მომწერა, რომ ფქვილის მითითებული რაოდენობა არ იყო საკმარისი. მეტი ფქვილი ცომს ამძიმებს, ამიტომ სჯობს ასე მოქცეთ: ფქვილს შეაზილეთ სითხე და არა სითხეს ფქვილი, როგორც ეს რეცეპტში მეწერა. ჯერ დაამატეთ ფქვილს საფუვრიანი მასა, შემდეგ, ნელნელა ამატეთ დარჩენილი რძე და კვერცხები. როცა მიიღებთ სასურველი სისქის ცომს, სითხის დამატებას შეწყვეტთ.
დიდი მადლობა PerfectCook.org-ის ერთ-ერთ ავტორს,ლუტას, რომელმაც არ დაიზარა და ამ რეცეპტის სრულყოფის მიზნით, თავადაც გააკეთა მცირე პორცია. უცვლელად გთავაზობთ მის კომენტარს და ინგრედიენტების რაოდენობას 1 საშუალო ზომის პასკისთვის:
“ერთი ცალი გავაკეთე
300 გრამი ფქვილი ვიხმარე 90 გრამი კარაქი 1 დიდი კვერცხი და 1 კვერცხის გული
100 გრამი რძე 150 გრამი შაქარი 2 გრამი საფუარი დაწნეხილი 50 გრამი არაჟანი. ინგრედეინტები არაფერი არ შემიცვლია
უბრალოდ ცოტა მომზადების პროცესი შევცავლე . ფქვილი იყო მკაცრად განსაზღვრული და იმის ხარჯზე დავარეგულირე კვერცხი და რძე .
როცა მივიღე სასურველი სისქე ცომის შევწყვიტე სითხის მიცემა . ფქვილს ვაზელდი სითხეს . რადგან ყველა ფქვილი სხვადასხვაა ამიტომ ფქვილის
ისე მიცემას ”რასაც შეიზელს” სითხის მოკლება ვამჯობინე .

საფუარი მოვზილე 25 გრამი რძითა და 50 გრამი ფქვილით +2 გრამი საფუარი და 1 ჩაის კოვზი შაქარი . მარილი ვუქენი ბოლში არაჟნის მერე . გადმოვიღე ჯამიდან და
დარბილებული კარაქი კრემივით გადავუსვი სამუშაო მაგიდაზე და ისე შევურიე.

ცომი იყო ხელს ეწეპებოდა
მაცივარში მედო მთელი ღამე . მეორე დილით ჯერ ერთი საათი ოთახის ტემპერატურაზე მედო და მერე დავამატე ქიშმიშები
ქიშმიშს საღამოს ცხელი წყალი დავასხი და 10 წთ თავდახურული მედო მერე გადავწურე წყალი და მთელი ღამე დავტოვე.
პირდაპირ კონიაკში არ ვალბობ რადგან ცხელი წყლით ”ჭუჭყი”სცილდება .
მაგრამ ფორმა მქონდა დიდი და ცომი პატარა . ამიტომ ვერ გაიკეთა გუმბათი .
ფორმაში რომ ჩავდე საფუარის სიმცირის გამო 8 საათი და კიდე მეტი ფუვდებოდა . თან ესენი ელოდებოდნენ სულ აღარ გამოცხვას მეკითხებოდნენ
უბრალოდ მინდოდა მეცადა პრობლემა რომ არის ფქვილზე ზოგი 1 კილოზეც მიდის ხოლმე სხვაობა თან დამატების შემთხვევაში მძიმდება ცომი
რომელიც მერე ძნელად ფუვდება და შედეგიც სხვაა ხოლმე. ამიტომ ფქვილის რაოდენობაზე პრობლემა სავსებით მოგვარებადია
ჯობია ერთი კვერცხით ,და 200 გრამით ნაკლები რძე ქონდეს ვიდრე ფქვილი დაემატოს . ეს არის ჩემი აზრი .”

სრულად შეგიძლიათ ამ ბმულზე იხილოთ

Use Facebook to Comment on this Post